Footer

Ti Ilocos Sur iti Uneg ti Sumaruno a 10 a Tawen

Quadrant II: Metro Vigan “World Heritage Area and Vigan IT Park”

Karaman iti daytoy a quadrant ti siudad ti Vigan, Caoayan, Sta. Catalina, San Vicente, Bantay, Santa, Narvacan, Sta.Maria ken San Esteban.

Ti Metro Vigan ti maikonkonsidera a highly urbanized area iti probinsia. Daytoy ti sentro ta masarakan iti daytoy a paset dagiti amin nga opisina ti gobierno, dagiti institusion ti edukasion, pasdek negosio, pasilidad para iti salun-at, hotel ken adu pay a sabsabali a pasdek a kasapulan iti urbanisasion. Gapu iti napaspas a panagdur-as ti siudad ti Vigan a kabisera ken dagiti kaabayna nga ili, adu nga umili manipud iti sabali a paset ti probinsia ti mangmangged ditoy ken kaaduanna payen ti mangayat nga agnaed a permanente ditoy. Iti populasionna a 215,943, daytoy ti kaaduan iti populasion kadagiti uppat a quadrants.

Gapu iti daytoy, kitkitaen ita ti gobierno probinsial ti posibilidad nga agbalin ti Metro Vigan kas sentro ti information technology (IT) babaen ti panagawis kadagiti lokal ken ganggannaet nga agipupuonan tapno agipasdekda kadagiti call centers ditoy.

Adda ditoy ti University of Northern Philippines (UNP), maysa nga state university a kangatuan iti standard iti sibubukel a Rehion Uno. Ita, adun a ganggannaet nga estudiante kangrunaanna dagiti naggapu iti Thailand ken India ti agad-adal iti UNP. Maysa kadagiti unibersidad iti sibubukel a pagilian a mangipapaay iti kababaan a tuition fee, napintas ngarud ti UNP a pagsakduan iti dekalidad nga adal iti kabaelan a matrikula.

Kasapulan met a mapapintas ti kalidad ti serbisio ken mapaadda dagiti kabaruan a ramit kadagiti balay pagagasan kangrunaanna kadagiti ospital ti turay tapno agbalin a sentro ti serbisio ti salun-at ti Metro Vigan. Daytoy metten ti mangidateng iti potensial iti medical tourism ditoy. Mabalinton dagiti turista manipud iti sabsabali a probinsia ken uray pay ganggannaet ti umay bumisita tapno padasenda ti makapnek ken kabaelanda a presio ti pannakataming dagiti kasapulanda iti benneg medikal.

Maysa pay a dakkel a potensial ti panagbalin ti quadrant II kas commercial center ti probinsia.  Mabalin dagiti pribado nga investors ti agipasdek kadagiti balay negosio kas iti malls kadagiti ili ti Bantay ken Narvacan a pakasarakan kadagiti nalalawa a bakante a lote a mabalin a padur-asen. Iti agdama adda maysa a mall nga imatonan ti pribado a negosiante iti Bantay idinto a maysa a mall a kukua ti LGU ti masarakan iti Narvacan. Itoy a panagtakem manen ni Gov. Chavit, maituloyen ti plano a pannakaipatakder ti convention center iti lote a kukua ti probinsia iti Tamag, Vigan. Ditoyton a maisayangkat amin a programa ti gobierno probinsial ken dagiti amin a national line agencies kasta metten kadagiti seminars para kadagiti grupo dagiti mannalon. Paupaandanto met daytoy kadagiti mangusar a pribado a sektor ket agbalin nga income generating project daytoy ti kapitolio.

Dakkel met ti potensial ti lugar iti benneg ti turismo. Adda ditoy a paset ti Vigan Heritage Village a namagbalin iti Vigan a kakaisuna a UNESCO World Heritage City iti pagilian. Rinibu a turista ti pumaspasiar Vigan City iti kada tawen tapno imatanganda ti naidumduma nga arkitektura dagiti kadaanan a balbalay ditoy. Karaman pay kadagiti atraksion ditoy Vigan City ti Baluarte Zoo, St. Paul Metropolitan Cathedral ken ti Simbaan a Bassit (cemetery chapel). Maysa pay a tourist destination ti Sta. Maria Church a maibilang kas UNESCO World Heritage Site. No dagiti natural nga atraksion ti pagsasaritaan, adda ti Pinsal Falls iti Sta. Maria, Paraiso ni Juan beach iti Narvacan, Imelda Park iti Santa, Caniao Falls iti Bantay ken sumagmamano nga igid ti baybay.

Adda met dagiti parambak a maisaysayangkat ditoy nangruna iti tiempo ti kalgaw. Iti Vigan City, maselselebraran ti Longganisa Festival tunggal maikatlo a lawas ti Enero idinto a tunggal umuna a lawas ti Mayo ti Binatbatan Festival of the Arts. Isaysayangkat met ti gobierno probinsial ti KANNAWIDAN Ylocos Festival a mangrugi iti maudi a lawas ti Enero agingga iti umuna a lawas ti Pebrero. Ditoy a maipakita dagiti agduduma a kadaanan a kultura ken partuat dagiti Ilokano kasta metten a ditoy a maramanan dagiti naimas ken maipagpannakkel a luto kas iti pinakbet, bagnet, empanada, tinubong, longganisa ken dadduma pay a produkto iti probinsia.

(Adda tuloyna)

Comments are closed.