Footer

Dios ti agbati, Luzviminda (Tuloyna)

Pinidut ni Elias ti auditibo. Kinontakna ti security officer ti eropuerto.

“Adda kadi kiddawenyo?” sinaludsod ni Col. Obispo.

“Kayatko a kontakem ni Angel Torpo, Col.,” kinuna ni Elias. “Kayatko a makipatang kenkuana live iti radio.”

“Kasapulan nga alaek pay ti pammalubos ti turayenmi a maipatangatang iti radio ti live interview ni Torpo,” insungbat ni Obispo.

“Saanen a kasapulan pay. Karbenganmi a maipatangatang ti mensahe a kayatmi a maidanon kadagiti kailianmi.”

“Agpayso. Ngem saan nga iti kastoy a situasion!”

“Ikkandaka iti kinse minutos a mangala iti pammalubos, Colonel!” intupak ni Elias ti auditibo.

Umanges-anges ni Elias a nangitupak iti bagina iti tugaw.

Kinita ni Abel ti oras iti pangupunguanna. Alas onse ti bigat. Nagdaras ti panagtaray ti oras, simmiplot iti panunotna.

Immirut ti iggemna iti putan ti paltog. Impalladawna ti panagkitana iti ruar ti bassit a tawa ti eroplano. Nalawag iti ruar. Awan ti ulep iti tangatang, tanda ti nalinak a panawen. Maisupadi ti panagpitik ti darikmat ditoy uneg ti eroplano. Mariknana ti nakaro a tension a mangsalsallukob kadagiti pasahero. Nasiputanna ti makapatay a kusilap ni Mayor Fernando de la Cuesta.

Ania met ngata ti agtartaray iti panunot ti mayor? No kitkitaem ti mayor, kasla awan ti amakna iti mabalin a dakes a mapasamak kenkuana iti imada a nanghaydiak iti eroplano. Ngem adda dagiti parsua a kasla naturedda iti sanguanan ti peggad ngem agkulpida iti apagapaman nga aplaw ti kinadamsak.

Tinaldiapanna ti paltog nga iggemna. Ammona itan ti bileg nga itden ti armas iti ima ti agikut. Iti bunganga ti paltog, asino ti saan a makarikna iti aliaw ken buteng iti kinadamsak nga itdenna?

Kellaat, simmiplot iti panunotna: no dumteng ti darikmat a maipasungalngal iti suli, kabaelanna kadi a kalbiten ti gatilio?

Nagwengweng ti transmitter. Dagus a pinidut ni Elias.

“Siak ni Angel Torpo,” inyam-ammo ti timmawag ti bagina. “Ania ti masapulyo kaniak?”

“Mr. Torpo, kayatmi a maipatangatang ti interbiom kadakami.”

“Kasapulan ti clearance dagiti agtuturay iti live interview,” kinuna ni Torpo. “Aguray ta kasaritak ti security officer.”

Kalpasan ti kasla makautoy a darikmat, nagtimek manen ni Torpo.

“Saan nga ipalubos dagiti agtuturay ti eropuerto a maipatangatang ti live interview,” kinuna ti radioman.

“Addatayo iti salinong ti demokrasia. Karbenganmi ti mangipatangatang ti aniaman a mensahe a kayatmi a maidanon kadagiti nangatngato nga agtuturay!”

“Maiduma daytoy a situasion. For security reasons a saankayo a mapalubosan a mangipatangatang iti aniaman a mensaheyo a sigurado a mangperdi iti imahe dagiti agtuturay nangruna ti kinatao ti maysa kadagiti pasahero.”

“Lehitimo dagiti akusasionmi, Mr. Torpo!”

“Ngem naikamangen iti korte ti akusasionyo. Apay a diyo urayen ti pangngeddeng ti korte?”

“Liman a tawen ti kaso iti korte ngem awan pay nagdur-asanna ta kas nakunamin, napamelmelan ti hues!”

“No adda pammaneknekyo a napamelmelan ti hues, apay a diyo imbutaktak idi pay laeng tapno naatur daytoy a kinakillo?”

“Inaramidmi amin a wagas tapno mailinteg ti pannakarabngis ti kalinteganmi ngem saankami a naitaltalek. Tapno mailinteg ti rekord, nagsuratkami iti gobernador, iti diputado, ken iti departamento ti agrario ken lokal a gobierno ken interior ngem ni balikas, awan naawatko a subalitda.”

“Mabalinmi nga interbioendaka dita uneg ti eroplano sami ipatangatang iti programami inton sardam.”

“Tapno editenyo nga umuna sakbay a maipatangatang? Tapno ikkatentayo no adda mabaddekan a tangan dagiti nabileg a politiko a kas ken ni Mayor Fernando de la Cuesta?”

“Ladingitek ngem awan mabalintayo ta dida ipalubos a makainnumanmi dakayo a live tapno direkta a maammuan dagiti tattao ti kayatyo a maiwaragawag iti publiko.”

“Ipasublatmo ti telepono ken ni Col. Obispo. Kayatko a kapatang,” kinuna ni Elias.

“Col. Obispo, speaking. Dengdenggek ti patanganyo ken ni Mr. Torpo. Sori, saan nga ipalubos dagiti turayek a maaramat ti ramitmi a pangipatangatang kadagiti ir-irukenyo maikontra iti maysa a tao.”

“Desperadokamin, Colonel. Diyo koma itulok nga adda mapasamak a dakes sayo ipalubos a maipatangatang ti mensahemi.”

“Ladingitek, Mr. Malvar, sursurotek laeng ti pammilin.”

“Ikkandaka iti treinta minutos a mangallukoy kadagiti apom iti demandami a live interview. No saan, maysa a pasahero ti paltoganmi!”

Indisso ni Elias ti auditibo a dinan inuray ti sungbat ni Col. Obispo.

(Adda tuloyna)

Comments are closed.