Footer

Dip. Singson, pinalubosan ti korte ti Hong Kong nga agpiansa

VIGAN CITY – Maragsakan ti bise mayor ditoy gapu iti panangipalubos ti maysa a korte iti Hong Kong nga agpiansa ti kabsatna a diputado a nakadetene gapu iti pannakumpiska iti ikutna dagiti illegal a droga iti eropuerto ti nasao a pagilian.

Iti interbio kenkuana ti media iti Barangay Capangpangan ditoy siudad idi Agosto 19, aldaw a pannakadengngeg ti kaso a drug trafficking maikontra ken ni Dip. Singson, kinuna ni Vice Mayor Singson a simmayaat ti kaririknana idi naammuanna a mapalubosan ti kabsatna nga agpiansa.

Maipalagip a naaresto ti diputado iti Chek Lap Kok International Airport idi Hulio 11 gapu ta mapapati a nagikut iti 26.1 grams a cocaine ken dua a tableta a diazepam wenno valium.

“Maragsakannak unay ta nakapagpiansa ni Cong. Ronald Singson,” kinuna ni Vice Mayor Ryan Luis Singson kalpasan ti panagiwarasna kadagiti kapote para kadagiti agbasbasa iti Capangpangan Elementary School ditoy.

Pinalubosan ti Tsuen Wan Magistracy’s Courts nga agpiansa ni Dip. Singson iti HK $1.5 milion (aganay a P6 milion) kalpasan a naipababa iti 6.7 grams ti dagsen ti illegal a droga a naala dagiti autoridad iti ikut ni Singson.

Iti pannakipatang ni Gov. Luis “Chavit” Singson iti national media, kinunana a bimmaba ti dagsen ti cocaine kalpasan a saan a nairaman ti botelia a nakaikabilan daytoy.

Kinuna ti gobernador a sumaruno a kiddawen ti abogado ti anakna ti pannakaipababa ti kaso daytoy manipud iti drug trafficking iti drug possession.

Segun iti bise mayor, adda gagayyem ti diputado iti Hong Kong a nangpiansa iti kabsatna ket innayonna a mapan iti Hong Kong tapno bisitaenna ti diputado.#

,

Comments are closed.