Footer

ITI INDAYON NI LAGIP: Nakasalda nga ayat (Tuloyna)

“Kayat laeng diay tao ti tumulong,” nakunak.

“Oy, babaiak met. Nakalawlawag kadagiti tignay ni Sir Marius nga adda riknana kenka. Ayna, no siak laeng, tinukmaakon ni Sir Marius. Manmano ti kastoy a gundaway.”

“Laglagipem nga adda asawa ni Sir Marius,” nakunak. “Basol iti Dios ken iti tao no patolak ti lalaki nga addaan iti asawa.”

“Loka, itoy a panawen, awanen dayta. Ti importante, ay-ayatem ti lalaki ken ipatpategnaka met.”

“Managbasol nga ayat dayta!”

Agkatkatawa ni Brenda a timmakder. Nabatiak a mangpulpuligos dagiti imbalikasna.

Simmiplot iti panunotko: nainkalintegan kadi ti sumrek iti maysa nga ayat iti baet a maysa daytoy a basol iti paglintegan ti tao ken iti imatang ti Dios? Nupay saannak a napeklan a katoliko, saan a maako ti riknak ken ammok a diak a maaramid dayta.

Kabigatanna, kas ninamnamak, pinaayabannak ni Sir Marius.

“Napanka gayam immutang iti SSS tapno adda pagbayadmo iti pannakayospital ni tatangmo,” nakunana. “Apay a dimo imbaga kaniak tapno natulonganka koma? Mano pay ti kurangmo tapno mabayadam amin nga utangyo iti ospital?””

“Adda pay dies mil. Ngem kababain no agpatulongak kenka. Ania la ti makunan dagiti katrabahuak no maammuanda?” nakunak.

“Rebbengmo nga ammuen nga iti daytoy a pagtagilakuan, kaarigtayo ti maysa a pamilia. No ania ti problema dagiti empleada, madadaan ti mangimaton a tumulong. Dayta ti polisia a sursurotek. Iti sumaruno, no adda problemayo, ibagayo la kaniak tapno maitedko ti maikanatad a solusion, wen?” kinuna ni sir Marius.

“Wen, sir,” nakunak. “Dakkel a yamanek ken dagiti kaduak iti panangisakityo kadakami nga empleadayo.”

Timmakder ni Sir Marius ket  linuktanna ti bassit a kaha de yero iti likud ti lamisaanna. Nangiruar iti kuarta.

“Kinse mil dayta. Ninayonak ta amangan no agkurang. Ipaw-itmo a dagus iti balayyo,” kinunana.

“Diak maawat dayta, sir,” nakunak. “Awan ti madadaan a sigida a pagbayadko.”

“In-inutekto nga ikkaten iti sueldom. Sige, awatem ketdin. Ken kas kanayon nga ibagbagak, no duduata, kayatko a Marius laeng ti awagmo kaniak. Napaspasig a denggen iti kasta,” inyisem ni sir Marius sana impapetpet ti kuarta.

“N-no isu ti kayatmo, sir… ay, Marius,” medio nagbeddalak pay gapu ta manen sinallukobannak iti naisangsangayan a rikna. Kasla awan ti gawayko a manglapsut iti dakulapko.

“Nasayaat no kasta,” nakasamsam-it iti panagkitak ti yiisem ni sir Marius.

Dinagdagusko nga impaw-it  inutangko a kuarta ken ti inted ni Sir Marius iti balaymi.

“Naimbag man ta nakautangka, anak,” nakuna ni nanang idi tinawagak. “Nagasatkayo nga empleada ta mannakaawat ti akinkukua.”

“Wen, nanang,” nakunak.

Nakarkaron ti sutil ni Brenda idi naammuanna a pinautangannak ni Sir Marius.

“Taltalekmo pay ta adda kabaliero a madadaan a mangisalakan kenka iti panawen ti panagkasapulam,” nakunana. “Iti panangpautangna kenka, kaarig maysa a salda dayta.  Kas nakunak idi, agur-uray laeng ni Sir Marius iti napintas a gundaway a mangipudno iti ayatna kenka. Asidegen ti idadatengna. Asidegen ti panangsaldana iti ayatmo!”

(Adda tuloyna)