Footer

Ti Ilocos Sur iti uneg ti sumaruno a 10 a tawen (Tuloyna)

Map of Ilocos Sur showing the location of Viga...
Image via Wikipedia

Kitkitaen met ita ti gobierno probinsial ti posible a pannakausar dagiti puerto a masarakan iti Caoayan ken San Esteban tapno mapagbalin a fishing ports idinto a mapagbalin a mineral ports ti Santa Port ken Narvacan Port. Mabalinto payen dagitoy a pakailuganan dagiti produkto iti talon ken dagiti makalapan iti kabaybayan.    .

Napateg pay ti eropuerto para iti pannakapasantak ti turismo isu nga agtultuloy ti pannakarehabilitar ti Vigan Airport tapno mabalinton a pagsangladan dagiti daddadakkel nga eroplano ken tapno pumasa daytoy iti international standards. Apaman a makompleto daytoy, nadardaraston dagiti turista a dumanon iti Ilocos Sur. Kagiddan dayta ti napaspaspaston a taray ti negosio ditoy a deppaar.

Dua a dadakkel a proyekto ti kalsada ti kasapulan iti quadrant II. Babaen ti pannakikammayet ti gobierno probinsial iti North Quad ken Department of Public Works and Highways, maad-adalen ti pannakapapintas ti agdama a Sta. Maria (Ilocos Sur) -Pilar (Abra) road ken ti pannakailukat ti Ilocos Sur-Abra road via Banaoang, Bantay, Ilocos Sur ken San Quintin, Abra. Dagitoy ti mamagsilpo kadagiti dua a probinsia a makatulong iti pannakakissay no di man naan-anay a pannakapugipog ti insurhensia iti kabambantayan.

Tapno dumakkel ti apit iti tunggal mamulaan nga ektaria ken tapno maikkan iti solusion ti parikut iti padanum, ipursige ti gobierno probinsial nga ileppas ti Banaoang Pump Irrigation Project a kuna ti National Irrigation Administration a 90% ti nalpasen iti proyekto. No mangrugin ti operasionna, daytoy ti mangpasayak kadagiti kataltalonan ti Vigan, Sta. Catalina, Bantay, Caoayan, San Vicente, San Ildefonso, Sto. Domingo ken Magsingal.

Quadrant III: Metro Candon “Agribusiness and Light Industrial Ecozone”

Addaan iti populasion a 152,019 ti maikatlo a quadrant a buklen ti Candon City, Sta. Lucia, Sta. Cruz ken Tagudin. Adu dagiti proyekto a mabalin a maipan iti daytoy a paset ken mabalin a papuonan pay iti pribado a sektor.

Gapu ta iti siudad ti Candon ti pakasarakan iti kalawaan a katabakuan ken agmulmula met iti tabako dagiti tallo pay nga ili a karaman iti daytoy a quadrant, ditoy a maipasdek ti planta nga agaramid iti handmade ken commercial a papel manipud iti kayo ti tabako imbes nga iti Santa kas improponer ti National Tobacco Administration itay napan a tawen. Nupay kasta, dakkel ti mabusbos iti pannakaipasdek ti planta ken ti balor dagiti kasapulan a makinaria. Ngarud, agur-uray ti gobierno probinsial ken NTA iti foreign assistance wenno kadagiti pribado nga agipupuonan tapno mairugi ti proyekto. Malaksid kadagiti nadakamat nga ili, mabalin nga akomodaren ti planta dagiti kayo ti tabako manipud iti amin a paset ti probinsia ken uray pay iti sibubukel a Rehion I. No mairugi, makatulong daytoy iti pannakakissay ti panagtarikayo a mausar iti panagaramid iti papel malaksid nga agbalin a kanayonan a kita daytoy kadagiti mannalon ti tabako. Agbalin met a sisasagana a merkado dagiti opisina ti gobierno iti probinsia ken rehion a makasapul iti papel iti inaldaw-aldaw nga operasionda. No adda surplus, mabalin a mailako dagitoy iti Metro Manila ken dadduma pay a paset ti pagilian.

Iti agdama, maprosproseson dagiti produkto a mani ti Sta. Lucia tapno agbalin a peanut butter, choco-peanut, pulboron, ken dadduma pay babaen ti bassit a processing plant iti Barangay. Luba a tartarawidwidan ti maysa a barangay-based a kooperatiba. Tapno matulongan dagitoy nga industria, mangted ti gobierno probinsial iti kanayonan a pagpuonan tapno adda igatangda kadagiti kasapulan a makinaria. Itoy a wagas ad-adu ti maprosesoda ken mabalinda pay a paaduen dagiti produktoda babaen ti panagaramidda iti greaseless peanut a naikabil iti tetrapack ken crunchy coated peanut nga addaan iti agduduma a flavors.

Babaen ti panangmanehar ti kooperatiba kadagiti kalamansi producers, naipasdek ti bassit a processing plant ket sumagmamano metten a tawen sipud inrugi ti ili a Tagudin nga iproseso ti produktoda a kalamansi tapno agbalin a calamansi ready to drink ken concentrate. Kas suportana iti daytoy nga industria, nangipaay ti gobierno probinsial iti pondo iti kooperatiba tapno umadu dagiti produktoda babaen ti panagaramidda iti calamansi jam, wine ken mabalin a serkenda ti panagaramid iti facial wash ken facial cleanser a kalamansi ti mausar a kangrunaan a ramen.

Kasta met laeng ti kayat a mapasamak ti gobierno probinsial kadagiti dadduma pay a produkto a masarakan iti daytoy a quadrant kas iti panagpaut ti kalamay ken chichacorn tapno saan a madadael uray maibiahe iti ballasiw-taaw. Katinnulong ti gobierno probinsial ti opisina ti diputado iti maikadua a distrito a mangipaay kadagiti kasapulan. Babaen itoy a wagas, maikkat ti doleout iti pampanunot dagiti umili ta masursuruan dagitoy iti pannakamanehar ti kooperatiba. Tumulong met ti Department of Trade and Industry iti pannakapapintas ti label dagiti produkto tapno mabalin dagitoy nga ilinia iti dadakkel a merkado idinto a mangted iti technical assistance ti Department of Science and Technology tapno masiguro ti kinadalus ken kinasustansia dagiti produkto.

(Adda tuloyna)

, , ,

Comments are closed.