Footer

Ti mantsa a pinarnuay ti kontrobersial a Licensure Examination (Maudi a paset)

Wen, nasken a palabsen iti sumagmamano wenno pinullo a tawen sakbay a maisubli ti panagtalek ti sabali. Ta karirigatan amin nga isubli ti napukaw a panagtalek. Itoy a kaso, adu ti mairaman iti basol a saanda met nga inaramid wenno nagayatan.

Nadagsen unay ti implikasion ti eskandalo ti licensure examination iti sibubukel a lubong, nangruna ti Estados Unidos ta agsipsiput ken agob-obserbada a nalaing tunggal adda maangay a eksamen iti pagilian, nangruna kadagiti health care providers. Ta ngamin no makaruar dagitoy eksamen iti nursing, physical therapy, occupational therapy ken dadduma pay iti health care ket mabalinda metten ti mangala iti eksaminasion iti Estados Unidos tapno makapagtrabahoda sadiay. Dayta ti reglamento  ken allagaden

Ti rigatna, kalpasan ti anomalia iti nursing, nairut unayen ti Estados Unidos kadagiti allagadenna. Estrikto unayen. Daytoy pay ngata ti maysa kadagiti kangrunaan a rason no apay a bimmassit dagiti mayat a mapan mangged sadiay Estados Unidos, lalo dagiti health workers. Naikkatan iti maysa iti apagkatlo a dagup dagiti agpinget a mangtun-oy iti kalkalikaguman nga American Dream.

Iti makatawen a pannakaiparit ita  dagiti physical therapist a mayat nga ageksam iti  FSBPT, sagsagabaendan ti nadagsen unay nga implikasion ti  napalabas a leakage exam scandal iti pagilian.

Masapul koma a masarakan dagiti solusion wenno sungbat dagiti timmaud a parikut. Tartarigagayan ti amin dayta. Ngem, sadino ti pakasarakan ken ania dagitoy? Narigat a sungbatan. Saan a maitudo ti nakananama a sungbat!

Ti saantayo a maawatan, nawaya unay dagiti review centers ket saan a makontrol ida ti gobierno.

Pinadas ti gobierno a kontrolen dagitoy a review centers ngem napaay iti daytoy nga addangna. Nupay naiyusuat ti PRC Modernization Act of 2000 wenno ti Republic Act 8981, saan nga inayonan dagiti review centers dagiti pagalagadan nga intuyang ti akta. Immabut ti asunto iti Supreme Court. Ti imasna, impaulog ti Supreme Court nga unconstitutional ti akta.

Kasano nga unconstitutional ti akta tapno kontraen dagiti review centers?

“After the nursing scam in 2006, the government thru an executive order, directed CHED to come up with a Memo Order putting all review centers under CHED, but this was questioned by the review centers,” kinuna ni Commissioner Nilo Rosas ti Professional Regulation Commission.

Saan nga inayonan ti Review Center Association of the Philippines (RECAP) agsipud ta kadakuada, saan a maitutop dagiti probision a mangbukel iti sibubukel nga akta.

“The Review Center Association of the Philippines is self-regulating and we’re the ones calling on the government to regulate us,” kinuna ni Carl Balita, vice-president of the RECAP, ken maipagarup a maysa kadagiti agtagikua iti St. Louis Review Center. “One issue in CHED control was that they did not want us to exist that time. Our requirement was to be attached to a school and to exist only as review center. We did not resist regulation,” inrason ti Balita. Dayta met ti takder dagiti amin a review centers.

Nalawag itoy a punto a saan laeng a ti CHED ti mangayat a mangkontrol kadagiti amin a review centers no di pay dagiti institute, kolehio ken unibersidad. Ta kayat met dagitoy nga eskuelaan a maipasidong laengen iti curriculum ti panagrepaso kadagiti licensure exams. Nalukaisan a kuarta ti gapuna ti saanda a panagkikinnaawatan !

Ta apay ngamin a maipasidong ti RECAP iti CHED ket saanda meten a paset ti curriculum kadagiti eskuelaan?

No dayta laeng ti parikut, apay a di ipasidong ti panagrepaso iti licensure exam iti maysa a governing body a buklen ti RECAP ken dagiti dutokan ti gobierno? Iti sabali a bangir, no mapasamak dayta, awanto ngatan dagiti tumaud nga asunto?

Ngem kabayatan a saan pay a mapasamak dayta, agtultuloy latta a sipsiputan ti sangalubongan dagiti licensure exams iti pagilian. Addanto latta anniniwan dagiti timmauden a kontrobersia a mangpaingpis iti tiansa a panagballigi dagiti examinees kadagiti amin a kita ti kumpetision iti merkado.#

, ,

Comments are closed.