Footer

Ti Sikap ni Goying

Pagsasao: Amin a sikap, adda katukadna a tikap.

Wenno iti nalawlawag a pannarita, amin nga aramid ket adda pagtungpalan wenno pagpatinggaanna.

Alaentayo nga ehemplo ni Goying, maysa a security guard iti maysa a dakkel nga otel iti Baguio City.

Kadagiti otel iti siudad, adda latta sidelinemo no sikyoka. Adu dagiti kustomer a nawadwad ti itedda a tip. Kasta ni Goying. Adu ti kuartana ta adda maiyar-arikap kenkuana a tip no adda bantayanna a kotse wenno adda itulodna a babai kas inkalbit ti kustomer.

Saan nga ipalubos dayta ti otel. Ngem  talaga a  nasikap ni Goying ta makaipuslit latta iti babai!

Awan ti pannakaammo ni baketna iti daytoy a sideline ni Goying. Kasano a makadlaw ket awan ni siping a maksay iti sueldo nga iyawat ni Goying kenkuana?

No dadduma, maasian pay ketdi ti baket ni Goying ta di man la dumawat daytoy iti uray para sigariliona. Pamrayan ti baketna nga ikkan ni Goying iti alawansna ngem kunanto met ni Goying nga idulinna laengen a para iti pagbasa ti annakda.

Iti daytoy a mangegmo iti asawam, saanka kadi a makarikna iti panagpannakkel a nakaasawaka iti kas ken ni Goying a saan la a mannakaawat no di pay ammona a saganaan ti masakbayan ti pamiliana?

Daytoy ti pangdaydayawan  dagiti kakadua ken ni Goying. Ania aya ti sikretona tapno mailemmengna ti kuartana iti asawana?

“Secret,” isungbat ni Goying.

Iti dayta a kalgaw, kaadu ti turista iti Baguio City. Siempre, kaay-ayo ni Goying ti agobertaym ta adu ti maited a tipna.

Iti maysa a rabii, bayat ti kaaddada a security guard (uppatda amin ta uray dagiti off duty ket dida naggawid tapno makaramanda met iti tip)  iti sango ti otel, naispatanda ti maysa a lalaki a mangluklukat iti kotse. Kinamatda ti mannanakaw. Nagpaputok ni Goying kas pammallaagna.

Ngem nagalis a kasla paltat ti mannanakaw a nagsikkosikko kadagiti eskinita ket saandan a nakamatan. Saanen a nagpulong da Goying iti polis ta awan met ti natakaw iti kotse.

Agsublidan iti otel, idi naklaat dagiti security guard idi agbassawang ni Goying.

“Apay, Goying, kaslaka met nauramanen?” sinaludsod ti maysa a sikyo.

“Tay kuartak! Nasurok a tallo ribu daydiay! Tipko iti makalawas!”

“Sadino ti nangikabilam?” inamad dagiti sikyo.

Nagngayemngem ketdi ni Goying a nangsirip iti barrel ti paltogna a kalibre 38. Dita gayam ti nangidulinna iti kuarta ket idi nagpaputok, nairaman metten a timmayab ti kuartana!

Iti sabali pay nga estoria, insigpit ti maysa a gayyemko ti sobre a naglaon iti kupkupitenna a kuartana manipud iti sueldona iti uneg ti kulongan ti asoda tapno saan a masukalan ni baketna.  Ngem maysa nga aldaw, gapu ta aggaddil metten dagiti annakda iti kagat dagiti timel, nangala ni baketna iti garami sana pinuoran iti uneg ti kulongan. Idi mapan alaen ti gayyemko ti kupitna a kuarta, nasilabanen ti sobre ket awanen ti kaes-eskan dagiti kuartana ta mapirsaydan.

Leksion daytoy nga estoria?

Amin a sikap, adda katukadna a tikap. No koma ta dida inlimlimed ti kuartada ket inyawatda iti baketda, di ti pamiliada koma ti nagimbag, saan?

Ay, sikap!#