Footer

79 tattao natiliw iti kampania ti kapolisan maikontra illegal a sugal

SAN FERNANDO CITY – Agdagup iti 79 a tattao ti ina-resto dagiti polis iti nasurok a makabulan a panangiwayatda iti naing-inget a kampania maikontra iti illegal a sugal.

Kinuna ni Police Chief Supt. Orlando M. Mabutas, regional director, PRO1 a naaresto dagiti nadakamat a personalidad iti panangisayangkat ti kapolisan iti Region Uno iti 31 a nagsasaruno nga operasion ken pa-nagraut kadagiti masuspetsa a lugar ken venue ti illegal a sugal a pakairamanan ti hueteng manipud Hulio 1 agingga iti Agosto 11, 2010.

Kinuna ni Mabutas nga inwayatda ti kampania kas panagtungpal iti direktiba ni Pres. Benigno Simeon C. Aquino a pannakapugipog daytoy nabayagen a sosial a problema nga illegal a sugal.

Iti Pangasinan a nakaisen-troan dagiti operasion, 27 ti naisayangkat a panagraut a nagresulta iti pannakaaresto ti 73 a gambling suspects, pannakakumpiska iti P40,317 a pusta ken 4 a video karera machines.

Dua ti naaresto iti La Union a nakakumpiskaan iti P466 a pusta idinto a dua ti natiliw iti Ilocos Sur ken Ilocos Norte ken nakakumpiskaan iti 2 a VKM.

Kinuna ni Mabutas a 25 a tattao ti napilaanen iti kaso a kriminal: 23 iti Pangasinan ken 2 iti La Union ti nakasaklangen iti nadumaduma a korte maikontra kadagiti nainbolbar a tattao a pakairamanan dagiti pinansier.

Karaman kadagiti maibilang a gambling offenses kas sagudayen ti RA 9287 ti card games, pula-puti, cara y cruz, fruit game machine, sakla, tupada, lotteng ken hueteng.

Kinuna ni Mabutas nga iti daytoy saan a sinsinan a pannakaisayangkat iti kampania maikontra iti illegal a sugal, ipatpatulod ti kapolisan iti Region I ti mensahe ken ballaag kadagiti agsalungasing a saan nga agsardeng dagiti law enforcers iti babaenna a mangipakat iti linteg nga awanan iti amak ken pabor.

Imballaag pay ti regional director a masukatan dagiti dadaulo a polis a saan a makapasardeng iti illegal nga aktibidad iti hurisdiksionda.#

Comments are closed.