Footer

BANNER NEWS: Panagabuso armado a grupo: diversionary tactics a pangdadael imahe ti kasoldaduan: Phil. Army

VIGAN CITY – Ti pammabasol a panagtakaw iti kalding ken panagkammel iti lapat ti masa ken panagkidnap ket maysa a pammadpadakes iti kasoldaduan, daytoy ti imbatad ti maysa nga opisial ti Philippine Army kas reaksionna iti waragawag ti New People’s Army a dagiti soldado ti nagisayangkat kadagitoy a panagabuso.

Iti interbiona iti DWRS a naipatangatang iti programa ni Jun Ramos a Barangay Brigada Commando, kinuna pay ni Staff Sargeant ti Philippine Army Marcelo Garcia a maysa a diversionary tactics tapno madadael ti imahe ti 50th Infantry Batallion ti pablaak ti Alfredo Cesar Command a ti kasoldaduan ti akin-aramid iti naireport a panagdadawat iti taraon, panagtakaw iti dingnguen, panagkalap iti lapat ken panagburas iti bunga ti mangga ken adda iti likudan ti panagpukaw ti maysa a mannalon a residente iti Barangay Poblacion, Salcedo, Ilocos Sur.

Naireport a nagpukaw ni Nicolas Ramos, residente iti Barangay Poblacion, Salcedo, Ilocos Sur idi pay la Hulio 28, 2010 a mapapati a kinidnap dagiti armado a tattao nga itudtudo ti militar a kameng ti New People’s Army.

Iti privilege speech ni Sangguniang Panlalawigan Member Robert Tudayan bayat ti sessionda idi Agosto 21, impalgakna ti naidanon a report kenkuana nga adda 20 nga armado a tattao nga agdakdakiwas kadagiti sumagmamano a barangay ti Salcedo, Galimuyod ken Santa Lucia a nagpabigbig a kameng ti NPA a nagdawat iti bagas ken dadduma pay a taraon, nagburasda iti mangga, ken nagkammelda kadagiti lapat iti asideg iti karayan iti Galimuyod ken nagtakaw iti baka ken kalding iti Salcedo ken Sta. Lucia.

Indagadag ni Tudayan ti pannakaimbestiga ti report a nagpukaw ni Nicolas Ramos, residente ti Barangay Poblacion, Salcedo, Ilocos Sur idi pay la Hulio 28, 2010 a mapapati a kinidnap dagiti armado a tattao idi mapan iti Barangay Dinaratan tapno mapan tumulong nga agraep iti pagay.

Kinuna ni Garcia a no adda operasion dagiti soldado, kumpleto ti probisionda para iti sumagmamano nga aldaw, kas panangkontrana iti alegasion ti Alfredo Cesar Command a mapan agdawdawat dagiti soldado iti taraon kadagiti tattao ken agtakaw iti kalding ken agkalap iti lapat.

Mainaig iti panagpukaw ni Ramos, kinuna ni Garcia nga idi maidanon ti report kadakuada, insigida a nangaramid dagiti opisialda iti tignay ken nakikoordinarda kadagiti local government units ken kapolisan para iti pannakabirok ti mapukpukaw a mannalon.

Kinuna ni Garcia a dagitoy a panagabuso ket mabalin nga aramid ti NPA tapno madadael ti imahe ti 50th IB, PA sana innayon a maysa daytoy a diversionary tactic iti biang ti NPA wenno Alfredo Cesar Command tapno “madadael ti napintas a gandat” ti kasoldaduan.

Kabayatanna, maysa a fact finding body ti binuangay ti kapolisan, militar ken ti gobierno probinsial tapno agimbestiga mainaig iti naireport a panagabuso dagiti armado a tattao nga agdakdakiwas a mapapati a kameng ti New People’s Army.#

,