Footer

Dios ti agbati, Luzviminda (Tuloyna)

“Agtutubo, saanyo a mabalin a butbutngen ti turay. Nasaysayaat laengen a sumukokayo,” kinuna ni Mayor Fernando de la Cuesta.

“Agulimekka!” imbugtak ni Abel sana indungso ti paltog ken ni Mayor de la Cuesta. Nagulimek ti mayor.

Kinita ni Abel ni Elias a nakamulengleng iti auditibo.

“No dida patgan ti kalikagumta, ania ti aramidenta?” inamadna iti nababa a boses.

“Madaraan ti runway ti eropuerto!” imbanang-es ni Elias.

Kellaat a nagwengweng ti transmitter. Pinidut ni Elias. Ni Baluigas ti umaw-awag.

“Addaak ditoy ospital,” kinunana. “Bad news…”

“Ania a dakes a damag?” inamad ni Elias.

“Napaltogan dagiti dua pay a nabatbati a saksiyo iti pannakapapatay daydi amam!”

“Kasano a napasamak dayta? Awan ti makaammo iti nagpaknianda no di la dakami.”

“Mabalin a nalimed a sinurotdak kalpasan a naipatangatang a pinilidak a mangtunton kadagiti saksi.”

Kas panangisalaysay ni Baluigas, dimmagas laeng iti opisinada manipud iti eropuerto ket impakadana iti editorna nga adda lead a surotenna mainaig iti pannakapapatay daydi Juan de la Cruz, Jr. nga ama ni Abel.

Nagsakay ni Baluigas iti kotsena a nagturong iti sitio Namalangan. Aganay 7 a kilometro ti kaadayo ti nasao a sitio manipud iti highway.

Nasarakanna ti kalapaw a nagpaknian dagiti dua a saksi. Inallukoyna ida a lumtuad a mangpatalged iti alegasion da Abel a ni Mayor Fernando de la Cuesta ti nagbilin iti pannakaipakni ti ama ni Abel. Dati a pasurot ti mayor dagiti dua ket segun kadakuada, addada a presente idi imbilin ti mayor ti pannakapapatay ni Juan de la Cruz, Jr.

“Kellaat ti napasamak,” kinuna ni Baluigas. “Iti pagkurbaan a rummuar iti asideg ti national highway, maysa a motorsiklo a nagluganan ti dua a nakahelmet a lallaki ti immabay iti kotsek ket pinaltoganda iti namin-innem dagiti saksi a nakatugaw iti likud. Napukawko ti kontrolko iti manibela ket naitapuak ti lugan iti kataltalonan. Naimbag ta bassit laeng ti garadgadko.”

Segun ken ni Baluigas, saanen a naidanon ti biag dagiti saksi gapu iti sugatda iti ulo ken barukong.

“Dimo nailasin dagiti kriminal, Mr. Baluigas?”

“Sori, pettat unay ti napasamak. Ngem hired killers dagiti pimmaltog kadagiti saksi. Trademark dagiti hired killers ti panagkalubbonda iti motorsiklo ken panagaramatda iti helmet tapno mailingedda ti kinasiasinoda.”

Namulenglengan ni Abel ti transmitter. Kasla nagrisud ti lubong iti abagana. Kellaat a nariknana ti nagdakkelan a bantot iti barukongna.

Iti pannakaipakni dagiti saksi iti pannakapapatay ti amana, nagpukaw a naminpinsan ti namnamana a maited pay ti hustisia kadakuada.

“Sori, kayatko ti makatulong ngem kastoy metten ti napasamak,” kinuna ni Baluigas. “No adda pay sabali a kiddawenyo, ibagayo latta no la ketdi kabaelak.”

“Kayatmi a kapatang ni Police Chief Supt. Angelo Marquez. Kayatmi a paimbestigana ti anak ni de la Cuesta. Kayatmi  nga independiente ti inbestigasion iti pannakapapatay dagiti dua a saksi,” kinuna ni Elias.

“Mr. Malvar, nagkutin ti provincial command a mangiwayat iti inbestigasion agsipud ta maysa a kameng ti media ti nairaman iti panagtambang,” kinuna ni Baluigas.  Kinapudnona, addan immay nanginterbio kaniak a lokal a telebision network. Naangotan metten ti national media ti napasamak ket addadan iti dalanda a mangkober iti pammapatay ken ti pananghaydiakyo iti maysa nga eroplano. Nagbalinkayon a national celebrity!”

“Saanmi a kinayat a mapasamak daytoy. Biktimakami iti kinaranggas ti maysa a rinuker ken gamrud nga agtuturay a mangar-aramat iti turayna tapno maital-ona ti bukodna nga interes.”

“Ti la pagladingitak ta iti pannakaipakni dagiti saksiyo, saanyon a magun-od ti hustisia iti pannakapapatay ti ama ni Abel ken ti pannakarames ti inana,” nakuna ni Baluigas.

Kasla napasaktan a tigre ni Elias a nagbanang-es a timmakder sana kuinelio ni Mayor Fernando de la Cuesta.

“Sinal-itka, sika la ketdi ti nagbilin iti pannakapapatay dagiti saksimi!” kinunana.

“Agmauyongkan, agtutubo,” kinuna ni de la Cuesta. “Kasano nga imbilinko dayta ket hostagekami ditoy eroplano?”

“Diay la ketdi anakmo ti nagbilin kadagiti pasurotmo a mangpapatay kadagiti saksi,” kinuna ni Abel.

Agtimek koma ti mayor ngem kellaat, nangmesmes ni Elias ket iti apagdarikmat, nagdisso ti maysa a disnog iti sungo ti mayor. Naiparusisi ti mayor. Nagaruyot ti dara iti agongna.

(Adda tuloyna)

Comments are closed.