Footer

Dip. Singson, na-set-up: Chavit

VIGAN CITY – Patien ni Gov. Luis “Chavit” Singson a naset-up laeng ti anakna a kongresista iti mapapati a panagikutna iti cocaine ken valium idi nagturong iti Hongkong idi Hulio 14.

Segun iti gobernador, madama ti panagimbestigada no asino kadagiti kakadua ni Cong. Ronald Singson ti nangikabil iti droga iti ikutna.

“Mabalin nga adda pakainaiganna daytoy iti politika, iti negosio wenno kadagiti umapal ken ni Ronald,” kinuna pay ti gobernador.

Iti hearing idi Agosto 19, inkeddeng ti Tsuen Wan Magistracy’s Courts a makapagpiansa ni Diputado Singson kalpasan a naipababa ti dagsen ti coccaine a naala dagiti otoridad iti eropuerto iti ikutna.

“Idi timbangenda ti nakumpiskada a nakaikabil iti bassit a bote, mapan a 26.1 a gramo. Daytoy ngamin ti standard operating procedureda iti airport. Saanda a ginaraw ti naggianna. Ngem iti korte, idi timbangenda ti karga ti bote nagbalin laengen a 6.7 a gramo,” inlawlawag ti gobernador.

Agdagup iti HK$1 milion (aganay a P6 milion) ti pinagpiansa ni Dip. Singson para iti temporario a pannakawayawayana.

Kas maysa a requirement iti temporario a pannakawayawayana ti inaldaw a panagreportna iti otoridad iti aniaman nga oras manipud iti alas 6 agingga iti alas nuebe ti rabii.

Kinuna ni Singson a nasalun-at ni Cong. Singson nupay madlaw a kimmuttong iti kapapanunot. Innayonna a natalged ti sasaaden ti anakna iti poder ni Derek Wong, ti nanggarantia ken nangpiansa kenkuana.

Inannugot ni Singson nga idi damo, saanna a kayat a tulongan ti anakna ta saanna pay nga ammo ti pudno a napasamak ngem ita ta naammuannan ti kinapudno, masapul a maaramid ti rumbeng.

“Nupay kasta, agpadispensarkami latta iti napasamak ta saan a nasayaat ti imahe nga impaayna daytoy nga insidente, saan la nga iti pamiliami no di pay ket iti probinsiatayo,”  innayon pay ni Singson.

Kabayatanna, impalgak ni Dip. Singson a dua nga opsion ti imbaga dagiti abogadona a pagpilianna mainaig iti kasona, no makilaban wenno ag-plead guilty.

Kinunana a dayta ti pagpapatanganda kadagiti abogadona sakbay ti naituding a pannakausig ti kasona.

Nagyaman ni Singson kadagiti nangikarkararag ken nangsuporta kenkuana bayat ti pannakadetenena iti pagbaludan iti Hong Kong idinto a kiniddawna  a di koma husgaran dagiti kailianna agingga iti saan pay a malpas ti hearing ti kasona.

Kinuna pay ti diputado nga ita ta nawayawayaanen, ad-adun ti tiempo a maipaayna para iti pannakaasikaso dagiti programa ken proyektona para iti umuna a distrito ti Ilocos Sur.

Kanaig dayta, agpa-Hong Kong dagiti mamayor iti umuna a distrito babaen ti awis ti diputado tapno makikoordinarda kenkuana maipapan dagiti proyekto  iti il-ilida.

Maangay ti sumaruno a hearing ti kaso inton Septiembre 7.#

,