Footer

ITI INDAYON NI LAGIP: Nakasalda nga ayat (Tuloyna)

Kalpasan ti makabulan, pinaayabannak ni Sir Marius iti opisinana.

“Ammom kadi ti agkumpiuter?” sinaludsodna kaniak.

“Ammok bassit,” insungbatko. Adda subjectmi idi a basic computer iti sekundaria. Medio napardasak met nga ag-encode.

“Pettat ngamin ti ipapan abroad ti sekretariak ket sika ti kayatko a mangsandi kenkuana,” nakuna ni sir Marius.

“Baka diak kabaelan…” nakunak.

“Panagkitak, kabaelam ti trabaho. Makasursurokanto. Mangrugikan ita nga aldaw.”

Ad-addan ti panangsutil ni Brenda kaniak idi madamagna nga innalanak ni Sir Marius a sekretariana.

“Sairoka a talaga,” kinuddotko ni Brenda. “Ikkam iti sabali a maris ti nasayaat nga ipakpakita ni Sir Marius kaniak.”

“Loka, sabsabali ti pannakilangen kenka ni Sir Marius. Adda la ketdi kayatna a gun-oden kenka. No saan nga ayat, ania ti tarigagayanna kenka?”

Diak nakatimek iti dayta nga imbalikas ni Brenda. Ngem kinutik laeng ti abagak idi agangay. Diak mamati nga adda sabali a rikna ni Sir Marius kaniak. Ngem diak malibak, mariknak kadagiti tignayna a kaslaak sarming nga iyal-alikakana. Ayat kadi dayta? Iti sabali a bangir, mariknak a naasidegak kenkuana. Kasla nagmaris ti aglawlaw no addaak iti sibayna. Naisangsangayan ti mariknak iti perrengna, iti panangiggemna iti sikok no kasdiay a sumrekkami iti maysa a panganan wenno iti panagballasiwmi iti kalsada. No dadduma, masalsaludsodko iti bagik: agayatak kadi met kenkuana? Ngem pamrayak laeng nga iwalin dayta a mapampanunotko. Adu ti utangko a naimbag a nakem ken ni Sir Marius ket diak kayat a maikkan iti sabali a maris ti pannakilangenna kaniak.

Ngem maysa a malem, bayat ti panagmeriendami ken ni sir Marius, kellaat a simrek ni Ma’am Lyka iti opisina. Naputed ti panages-estoria ni Sir Marius idi makitana ni Ma’am Lyka.

“Ita man pay a naidaw-aska?” sinaludsod ni sir Marius idinto a sinabatna ti asawana.

“Nagpintas ketdin a buya ti madatngak,” kinuna ketdi ni Ma’am Lyka. Nariknak ti ipas iti balikasna. “Isu kadi ti baro a sekretariam?”

“Wen,” insungbat ni sir Marius sanak inyam-ammo.

Nabayag a pinerrengnak ni Ma’am Lyka sa napan nagpusot iti tugaw ni sir Marius.

“Iyaramidannak man iti kape,” imbilinna kaniak.

“Yes, Ma’am,” insungbatko. Rimmuarak iti opisina ket inyaramidak iti kapena.

Iyunegko koman ti kape idi matimudko ti napigsa a panagsinnungbat ti timek dagiti agassawa.

Diak koma kayat ti dumngeg ngem nalawag a mangegko ti bosesda a di kabaelan nga ilinged ti napuskol a sarming.

“Pudno gayam ti madamdamagko nga adda kulasisim!” timek ni Ma’am Lyka.

“Saan a pudno dayta,” nangegko a sungbat ni Sir Marius. “Ammo ti Dios nga awan ti sabali a babai iti nagbaetanta.”

“Nalawlawag pay ngem init ti nadatngak itay. No saanmo a babai, ania koma ti sasaadenna iti opisinam? Saan met a kualipikado ta high school la ti naigraduarna. Diak la patien nga ammona dagiti trabaho ti maysa a sekretaria. Ti la ketdi agpasaklot ti paglainganna!”

“Managipapanka la unay. Dinak ipadpada kadagiti am-ammom a lipliputanda ti asawada. Saanak a kas kadakuada!”

Diak napakadaan ti panaglukat ti ridaw sa ti makadayyeg a pannakairikepna. Makaipas ti kusilap ni Ma’am Lyka kaniak sa kasta unayen ti banang-esna a rimmuar.

Rimmuar ni Sir Marius. Immanges iti nauneg sa immasideg kaniak.

“Nangegmo la ketdi ti panagsinnungbatmi ken ni Lyka,” kinunana. “Kababain pay kenka.”

“Kumitakan iti sabali a sekretariam, sir,” nakunak. “Daydiay talaga a rumbeng nga aggian ditoy opisinam.”

“Aggianka ditoy agingga iti siak ti boss daytoy a pagtagilakuan!” nakuna ni Sir Marius. “Mapnekak iti trabahom ket saanko nga itulok a ni Lyka ti makagapu a pumanawka iti puestom!”

(Adda tuloyna)