Footer

Kameng ti media, nastrek ti scammer ti emailna

VIGAN CITY – Imballaag ti maysa nga agiwarwarnak a nakabase ditoy siudad a saan a pudno ti agwarwaras nga emailna iti internet a dumawdawat iti tulong gapu ta natakawan iti United Kingdom.
Kiniddaw ni Mancielito S. Tacadena kadagiti gagayyemna ti saanda a panamati iti agwarwaras nga emailna nga agpatpatulong a maipaw-itan iti kuarta agsipud ta maysa daytoy a panangallilaw ti maysa nga scammer.
Iti text messagena iti Tawid News, kinuna ni Mancielito S. Tacadena, reporter ti NBN Vigan ken anchor iti maysa a programa iti lokal a cable TV, a manipud pay idi Agosto 20, saannan a ma-access ti emailna agsipud ta sinerreken ti maysa nga scammer.
Nakalanad iti email nga adda ni Tacadena iti United Kingdom ngem natakaw ti bagna, agraman passport ken kuartana ket agpatpatulong kadagiti gagayyemna a paw-itanda iti kuarta tapno makaawid.
Kas nailanad iti email, inkari ni Tacadena a bayadanna ti maipatulod a tulong kenkuana apaman a makaawid.
Daytoy ti maikadua a gundaway a naaramat ti nagan ti maysa a mannurat a pangallilaw babaen ti email iti internet.
Iti napalabas, naserrek met ti maysa nga scammer ti email ni Amado I. Yoro, mannurat nga agnaeden iti Hawaii, ket babaen ti email daytoy, napatulodan iti surat dagiti am-ammo ken gagayyem ni Yoro a nagkiddawanna iti tulong kadakuada agsipud ta natakawan iti UK.
Sumagmamano a gagayyem ni Yoro ti namati iti surat ket nangipatulodda iti tulongda a kuarta iti maysa nga account. Saandan a napasubli pay ti kuarta.
Kinuna ni Tacadena a nangiwayaten kadagiti addang tapno malapdan ti pannakabiktima dagiti am-ammo ken gagayyemna a mabalin a napatulodan iti surat nga agdawdawat iti kuarta.#