Footer

Saan nga aramid ti NPA, mangkigtot, agtakaw: Alfredo Cesar Command/NPA-Ilocos

VIGAN CITY – Inwaragawag ti Alfredo Cesar Command/NPA-Ilocos a saan nga aramid ti NPA ti mamutbuteng ken agtakaw iti pagbiagan dagiti umili kas ipabpabasol ti kasoldaduan.

“Iti kaanoman, saan nga aramid ti NPA ti mangkigkigtot, mangbutbuteng ken mangdangran iti masa aglalo ti agtakaw iti sanikua ken kabiagan ti masa ken pagbiagan ti masa…” kinuna ti ACC/NPA-Ilocos iti surat a naipatulod iti DWRS a naipatangatang idi Agosto 23 ditoy siudad.

Iti surat ti maysa a Miguel Cervantes, mapapati a pannakangiwat ti ACC/NPA-Ilocos, a napetsaan iti Agosto 3 nga imbasa ni Jun Ramos iti programana a Barangay Commando Brigada, pinakdaaranna ti publiko iti  isaysayangkat ti 50th IB, PA a “nasaknap ken kumarkaro a narugit a taktika” a mangpadakes iti imahe ti New People’s Army.

Kinuna ti surat a maysa a modus operandi ti “reaksionario a tropa” nga agpammarangda a kas NPA nga “agkikil, agtakaw,  mangal-allilaw, mangbutbuteng wenno mangdangran kadagiti masa a makasalaw kadakuada…”

Dinakamat ti surat ti “involuntary disappearance” ni Nicolas Ramos a napan nakiraep iti Barangay Dinaratan, Salcedo nga inwaragawag ti 50th IB, PA nga innala ti NPA ni Ramos a kas guide, ti panagkalap iti uppat a lapat ti masa, panagtakaw iti kalding iti Galimuyod, panagburas iti bunga ti mangga iti Salcedo, panagdawat iti bagas ken taraon kadagiti umili a mapapati a pinagparang ti kasoldaduan a kameng ti NPA dagiti nagaramid.

Iti privilege speechna iti sangguniang panlalawigan, indagadag ni Tudayan ti pannakaimbestiga ti report a nagpukaw ni Nicolas Ramos, residente ti Barangay Poblacion, Salcedo, Ilocos Sur idi pay la Hulio 28, 2010 a mapapati a kinidnap dagiti armado a tattao idi napan nakiraep iti Barangay Dinaratan, Salcedo.

Kinuna pay ti ACC/NPA-Ilocos a “konkondenaren(na) ti aramid ti 50th IB, PA a panangallilaw, panagbutbuteng, panagriribuk iti komunidad ken panagtakaw kadagiti sanikua ken produkto ti masa… ti malisio a panagpampammarang dagiti tropa (50th IB, PA) kas NPA kadagiti barbario ti Galimuyod, Candon, Sta. Lucia ken Salcedo a “maysa a desperado nga addang ti kabusor tapno perdien ken isina ti NPA ti masa…”

Kiniddaw ti ACC/NPA-Ilocos ti panangbigbig a nalaing dagiti umili dagiti sumangbay kadakuada tapno maidasigda dagiti agpampammarang a kameng ti NPA.#

Comments are closed.