Footer

BANNER NEWS: PhilHealth, mapolpolitika: SPM Singson

VIGAN CITY – Adda dagiti local chief executives a mangpolpolitika iti programa ti PhilHealth, daytoy ti linagidaw ni Bokal Jeremias “Jerry” Singson bayat ti pannakiuman kenkuana ti maysa a lokal a radio reporter itay nabiit.

Kinuna ni Singson a rumbeng koma nga awan ti politika iti pannakaipaay ti PhilHealth ngem adda dagiti mayor a pagpolitikada daytoy a programa ket saan a mabenepisiaran dagiti amin nga umili nangruna dagiti indigent.

“Dapat koma daydiay (PhilHealth), awan ti politikana, ngem saan a maikkat, saan a maiwasan aglalo dagidiay dadduma a mamayores ket talaga nga ipapolitikada,” kinuna ti bokal bayat ti interbio kenkuana ni Jessie Ancheta ti Bombo Radyo itay nabiit.

Nupay kasta, kinuna ni Singson nga awan ti pilpilien ti gobierno probinsial kas impaganetget ti bise gobernador.

“Kas kuna ni Vice Gov. DV Savellano, uray siasino a sumrek iti Gabriela Silang General Hospital nga awan ti PhilHealthna, ikkantayo… uray aniaman ti kolorna iti politika, kangrunaan dagiti narigat ti panagbiagna,” kinuna ni Singson.

“Kasdiay koma amin a panggeptayo…” ket “nasaysayaat koma nga amang no dagiti local government units, awan ti pilpilienda… dagiti laeng koma awanan ti talaga nga ikkanda iti prioridad iti PhilHealth ta isuda a talaga ti makasapul,” kinuna ti bokal.

Tapno ad-adu a residente iti probinsia ti mabenepisiaran iti programa ti PhilHealth, nagpirma ti gobierno probinsial, gobierno munisipal ken congressional districts iti katulagan a pagbubuliganda nga ibaklay ti premium dagiti irehistroda nga agmiembro iti nasao a programa.

Mainayon pay ditoy ti programa ti gobierno probinsial nga outright a mailista a kameng ti PhilHealth ti maysa a marigrigat a pasiente apaman a simrek nga agpaagas iti aniaman a district hospital iti probinsia.

Ngem mapapati a naisardeng daytoy gapu ta adda rimsua a problema iti nagbaetan ti gobierno probinsial ken ti PhilHealth.

Kanaig daytoy, naurnos met la ti problema iti nagbaetan ti PhilHealth ken ti gobierno probinsial kalpasan a nagsurat ni Gov. Luis “Chavit” Singson ket tinakderanna ti obligasion ti gobierno probinsial iti nasao nga ahensia.

Mapapati a saan a kinayat ti PhilHealth a bayadan ti singiren dagiti district hospitals nga immabut iti P15 milion agsipud iti maipagarup a di pannakabayad ti gobierno probinsial iti annongenna a premiums dagiti PhilHealth members.

Mapapati a naapektaran pay ti Botika ng Probinsya agsipud ta awan metten ti sumangpet a consignment nga agas gapu ta di met makasingir dagiti district hospitals iti PhilHealth.

Segun iti bokal, naikkan ti Botika ng Probinsya iti inisial a P5 milion a pondo ket kalpasanna pasigen a consignment dagiti sumaruno ngem awan ti agsangpet nga agas gapu iti kaawan ti masingir dagiti district hospitals manipud iti PhilHealth a paggatangda kadagiti agas.

“Hopefully iti masakbayan, maurnostayo (PhilHealth program) ta panggep ti gobierno probinsial a maikkan iti PhilHealth amin a kaprobinsiaan,” kinuna ni Singson.#

Comments are closed.