Footer

CHED director, agtugaw nga OIC ti NLPSC

CANDON CITY – Agtugaw pay laeng ti regional director ti Commission on High Education (CHED) a kas officer in charge iti kabarbaro a pagadalan ditoy siudad.

Nadesignaran ni Dr. Caridad Abuan, regional director ti CHED, a kas OIC ti North Luzon Philippine State College (NLPSC) babaen ti CHED Special Order No. 45 a pinirmaan ni Dr. Patricia Licuanan, agdama a chairman ti CHED.

Maipalagip a napagbalin ti dati a University of Northern Philippines-Candon nga NLPSC kas maibatay iti R.A. 10085 a pinutar ni dati a Cong. Eric Singson a mangisina iti UNP-Candon manipud iti UNP  iti Vigan City.

Kanaig daytoy, maysa a taripnong ti inangay ni Abuan iti NLPSC a tinabunuan dagiti mangisursuro ken empleado ti dati a UNP-Candon ket trinatarda dagiti problema para iti nasayud a transision ti pannakaisina daytoy iti UNP-Vigan.

“Maragsakannak ta narespetoda kaniak (dagiti mangisursuro ken empleado),” kinuna ni Abuan bayat ti interbio kenkuana ti DZTP idinto a kiniddawna ti kooperasion dagiti mangisursuro ken empleado para iti naurnos ken nasayud a transision.

Kinuna ni Abuan a temporario laeng ti panagtugawna iti NLPSC.#

Comments are closed.