Footer

Historical tarpaulins, naipasdek

VIGAN CITY – Tapno maipasagepsep ti nagbalin a paset ti probinsia iti pakasaritaan ti pagilian, addan dagiti naipasdek a tarpaulin kadagiti ili a nakaaramidan kadagitoy historical a pasamak.

“Addan dagiti tarpaulin a naikabil kadagiti luglugar a nakaaramidan dagitoy a paspasamak maipanggep iti historia ti Pilipinas,” kinuna ni Vice Governor Deogracias “DV” Savellano, sana inyunay-unay a malaksid a maipasagepsep ti nagbalin a paset ti probinsia iti historia ti pagilian, karagpin ti proyekto ti livelihood component a makatulong iti panagbiag dagiti residente dagiti maseknan nga ili.

Addan naipasdek a tarpaulin iti Imelda Park idiay Santa a printout ken pakabasaan ti pannakirupak ni Gabriela Silang, asawa ni Diego Silang, a nangirubbuat iti rebolusion maikontra kadagiti Kastila iti Ilocos ken iti San Ildefonso a nakapasamakan ti nadara a ranget iti nagbaetan dagiti Kastila ken Ilokano a nagramut iti Basi Revolt, kasta met dagiti naipasdek iti dadduma pay a paset iti probinsia.

Segun ken ni Savellano, mabalin dagiti agnaed kadagiti nadakamat a lugar ti mangipatakder iti asideg ti nakaikabilan ti tarpaulin iti souvenir shops wenno pakailakuan dagiti produktoda a mangipaay iti kanayonan a pamastrekan ti ili wenno barangay.

Kinuna ni Savellano a babaen ti naipasdek a tarpaulin, mabasa ken mabuya payen dagiti agpasiar a turista ti napasamak iti nasao a lugar idinto nga impaganetgetna a naresertsda gapu ta paset dagitoy iti historia ti pagilian.

Kinuna ti bise gobernador a babaen ti historical tarpaulin, agbalin nga aware dagiti umili nga adda gayam napasamak iti lugarda ken iti sibubukel nga ili nga “ines-estoria dagiti lelong ken lelangda.”

Kinuna ti bise gobernador a gapu ta addan naipasdek a historical tarpaulin, “ma-appreciate dagiti agindeg ti kinapateg ti lugarda ket aginteresda payen mainaig iti historia.”

Indagadag ni Savellano a padur-asen ken papintasen dagiti lumugar ti nakaipasdekan dagiti historical tarpaulin tapno agbalinda a tourist destination.#

Comments are closed.