Footer

ITI INDAYON NI LAGIP: Nakasalda nga ayat (Tuloyna

Inyumanko ti parikutko ken ni Brenda. Naammuanna metten ti panangsalangad ni Ma’am Lyka ken ni Sir Marius. Nagdaras a nagwaras ti napasamak. Adda dagiti nangbabalaw iti asawa ni Sir Marius iti inaramidna. Adda met dagiti kimmanunong agsipud ta adda metten suspetsada nga adda relasionmi ken ni Sir Marius.

“Kayatkon ti agikkat iti trabahok,” nakunak ken ni Brenda.

“Loka, apay ketdin nga agikkatka? No pumanawka, pagbirokam iti trabahom? Nagrigat ti sumrek iti trabaho iti daytoy a panawen.”

Diak nakatimek. Agpayso ti kinuna ni Brenda. Kasanon no saannak a makabirok a dagus iti sabali a pagtrabahuak?

“Ngem mabainak unay kadagiti kakaduatayo. Amangan no sabsabali ti panagipapanda. Baka kunada pay ketdin a kabitnak ni Sir Marius,” nakunak.

“Apay nga isuda ti panunotem? Awan met ti dakes nga ar-aramidenyo. Aggianka iti puestom. Ad-addan ti panagipapanda a pudno nga adda relasionyo ken ni Sir Marius no agikkatka iti trabahom,” nakuna ni Brenda.

Saannak ngarud a nagikkat iti trabahok. Agpayso ti kinuna ni Brenda. Apay a ti sawen dagiti katrabahuak ti pampanunotek ket awan met ti ar-aramidenmi a dakes ken ni Sir Marius?

Nupay kasta, manipud idin, nagannadak iti pannakilangenko ken ni Sir Marius. Saannak pay unayen a kumuyogkuyog kenkuana no adda kayatna a gatangen. Ipambarko nga adda nasken nga itrabahok iti kaserak,

Mannakaawat ni Sir Marius ket saan metten nga agkidkiddaw unay kaniak a kuyogek iti papananna kalpasan ti opisina. Ngem saan a nagbaliw ti pannakilangenna kaniak. Nagtultuloy ti panangsursurona kaniak tapno nasaysayaat pay ti panangakemko iti annongek.

Maysa nga aldaw bayat ti panagmeriendami, sinaludsodna kaniak no awanen ti arapaapko a ngumato pay ti panagbiagko.

“Hammn, Sir,” nakunak. “Adda met arapaapko nga umasenso ti biagko. Kinapudnona, agur-urnongak ta kayatko nga ituloy ti panagbasak. Ngem saan pay nga ita ta bassit pay ti matgedak ken awan pay ti tiempok nga agbasa ta agmalmalemak met ditoy opisina.”

“Ania ti kurso a kayatmo nga alaen?”

“Commerce koma. Ngem diak pay met kabaelan ti dakkel a mabusbos iti panagbasak,” nakunak.

Nagtungtung-ed ni Sir Marius. “No nasged ti tarigagaymo a makaturpos, apay ketdin a dimo magun-od?” nakunana.

“Maup-upayak pay ketdin, Sir,” nakunak. “Agingga ita, diak pay nabayadan amin diay impautangmo kaniak a pinagbayadko iti ospital idi nagsakit ni Tatang.”

“Dimo panunoten dayta. Ti importante, itultulodam ket dandanimon mabayadan.”

Kunak no nagpatinggan dayta a patanganmi. Napukaw pay ketdin iti panunotko ta kadagiti simmaruno a lawas, immadu ti trabahomi iti pagtagilakuan. Dimmur-as ti pagtagilakuan gapu ta immadu dagiti kustomer. Dimmakkel dagiti order ni Sir Marius a tagilako.

Iti Christmas party nga inangayna para kadakami a trabahadorna, adda amin regalomi. Adda pay intedna a bonusmi, malaksid ti 13th month paymi.

Nakaragragsak dagiti katrabahuak a naggawid.

Nagbatikami ken ni Brenda ta timmulongkami a nagipakni.

“Inton Enero, mangrugikan nga assistant secretary,” kinuna ni Sir Marius ken ni Brenda.

“Agyamanak unay, boss!” nakuna ni Brenda ket no awanak ngata, mabalin a naarakupna ni Sir Marius iti ragsakna.

“Kayatko a sursuruem dagiti dadduma nga akem toy gayyemmo ta inton panaglulukat ti klase bigatto laengen ti panagtrabahona ditoy opisina ta ituloyna ti agbasa iti malem,” nakuna ni Sir Marius.

Naklaatak iti nangegko. Diak ninamnama dayta nga imbaga ni Sir Marius!

(Adda tuloyna)

Comments are closed.