Footer

SARITA: Dios ti agbati, Luzviminda (Tuloyna)

“Saankami a waeng a mamati lattan iti kinaulbodmo!” kinuna ni Elias. Impusotna ti bagina iti tugaw. Binakalna iti kusilap ti mayor a mangpunpunas iti dara iti bibigna.

“Malvar, ania ti mapaspasamak dita? Ania daydiay nangegmi a nagasug?” nagdadaraddan dagiti saludsod ni Baluigas.

“Awan, Mr. Baluigas. Adda laeng nakigtot a bao a simmuksok iti pantalon ni Mayor de la Cuesta.”

“Nagkarikayo, Malvar, nga awan ti pakaan-annuan dagiti pasahero.”

“Agtalekka iti karimi, Mr. Baluigas. Saankami a kas kadagiti sabali a tao a kinaulbod ti agasut iti bibigda, kas ken ni Mayor de la Cuesta.”

“Dikayo koma agaramid iti ad-adda a pakairarebanyo. Agpayso man dagiti akusasionyo maikontra ken ni  de la Cuesta ngem kas maibatay iti linteg, inosente agingga a saan a mapudasdasan iti korte a nakabasol.”

“Nakunam nga awanen ti maaramidanmi a mangilidding ken ni dela Cuesta gapu iti pannakaipakni dagiti saksi iti pannakapapatay daydi John de la Cruz, ngem nagbiddutka, Mr. Baluigas,” nagtupa ti sangi ni Elias. “Adda iti imami ti pannakabalin a manggun-od iti pudpudno a hustisia!”

“Kasano?”

“Babaen ti buli, Mr. Baluigas! Siguraduek kenka a mapasamak ti pagsasao a no ania ti imulam, isu ti apitem. Nagmula ni de la Cuesta iti kinadamsak, apitenna met ti kinadamsak!”

“Ad-adda laeng a dumagsen dagiti basolyo, Malvar no dayta ti aramidem!”

Indisso ni Elias ti auditibo. Immasideg ni Abel.

“Ania itan ti aramidenta?” inamad ni Abel. Dakkel ti pannakauppapayna iti pannakaipakni dagiti dua a saksi a namnamana a mangsirot iti tengnged ni Mayor Fernando de la Cuesta.

Nagwingiwing ni Elias. Umanges-anges a nangtaldiap iti oras ti pungupunguanna. Alas dosen. Isu met la nga agkirausen ti tianna. Nagkape laeng itay bigat sakbay a pimmanaw iti balayda.

Binilinna ti stewardess a mangisagana iti uray ania nga ipauneg dagiti pasahero.

“Maysa laeng a tao ti diyo ikkan iti pangaldawna, ni Mayor de la Cuesta,” nakuna ni Abel.

“Ibagbagayo a dakayo ti taklin dagiti marabrabngis ti kalinteganda. Maysa a panangrabngis iti kalintegak ti panangipaidamyo kaniak a mangaldaw,” nagtimek ni Mayor de la Cuesta.

“Pakanendaka, apay ket a saanen? Masapul laeng a mangegmi ti panagpakpakaasim,” kinuna ni Abel. “Ngem imposible a maitured  ti maysa a kas kenka a natangig nga agturay ti agpakaasi iti nababa a tao a kas kadakami.”

“Diyo namnamaen nga agpakaasiak kadakayo,” nagngirsi ti mayor.

“Makaammoka,” kinuna ni Abel. “Ngem anusam ti mabisinan iti umuna a gundaway.”

Kinita ni Elias iti pungupunguanna. Naglabesen ti ultimatum nga intudingna a pannakaipalubos ti interbioda iti radio.

Timmakder ni Elias sana pinidut ti auditibo. Kinontakna ni Col. Obispo.

“Naglabesen ti oras a panangalam iti pammalubos a maipatangatang ti interbiomi iti radio, Colonel,” nakunana. “Kayatko a maammuan ti resultana.”

“Negatibo, Malvar.”

“Diyo suoten ti pasensiami, Colonel!”

“Nalawag ti pagtaktakderan dagiti turayenmi. No interview on the air.”

“Ultimatum daytoyen, Colonel. Ikkandaka iti sabali pay a treinte minutos. No saan, tunggal kinse minutos a madaraan-ti andamio!”

Naglitek ti auditibo a di pay nalpas ti panagsao ni Elias. Namesmesan ni Elias ti auditibo ket dina napupuotan ti panagbassawangna.

Immasideg ni Abel ken ni Elias.

“Kasaritata ni Baluigas ta idanonna ken ni gobernador ti demandata a makainterbio ti media,” nakunana.

“Nasayaat dayta a napanunotmo,” insungbat ni Elias.

Pinidutna ti auditibo. Imbilinna ti panangkontak ni Col. Obispo ken ni Baluigas iti ospital.

Sumagmamano a minuto, naguni ti transmitter.

“Rimmuaren ni Baluigas iti ospital. Madama ti panangkontakmi iti pagiwarnak a pagpapaayanna,” kinuna ni Col. Obispo.

“No komuntak, ibagayo a kayatmi a kapatang ti gobernador, Colonel.”

“Namnamaenyo nga idanonmi ti kiddawyo.”

Indisso ni Elias ti auditibo. Agiruaren dagiti stewardess iti pangaldaw.

“Iyunayo dagiti ubbing ken babbai,” kinuna ni Abel.

Nagwanengweng ti transmitter. Ni Baluigas ti umaw-awag.

“Kayatdak kano a kapatang,” kinuna ni Baluigas. “Ania kadi?”

“Kayatmi a kapatang ni Gov. Angelo Sison. Kayatmi a mangbukel iti task force a mangimbestiga ken ni Mayor de la Cuesta.”

“Madama ti mitingda nga opisial ti Liga dagiti Gobernador iti Manila. Ngem padasek a kasarita ni gobernador.”

Madamdama, naguni manen ti transmitter. Ni Baluigas.

“Nakasaritak ti Presidente, Malvar,” kinunana. “Maymaysa ti pagtaktakderanna. Wayawayaanyo pay dagiti pasahero sakbay a makitulag kadakayo!”

(Maigibusto)

Comments are closed.