Footer

Tomato paste plant, imatonan dagiti negosiante manipud Italia

SANTA, Ilocos Sur -Binisita dagiti Italian investors ti planta ti kamatis iti Barangay Mabilbila ditoy nga ili idi Agosto 23-24 para iti posible a panangbiag manen ti operasion daytoy.

Iti interbio ni Gov. Luis “Chavit” Singson, kinunana nga addaan met laeng dagitoy a negosiante iti umasping a planta iti pagilianda ket isudan ti mangmanehar iti tomato paste plant babaen ti panangupada iti nagserra a planta a kukua ti probinsia.

Indauluan ni Nuccio Saverio, presidente ken CEO ti NS International Inc., ken Renato Ponzi ti Asepsystems Food Processing Plant dagiti investors a naginspeksion iti Ilocos Sur Tomato Paste Plant tapno kitaenda no mabalin pay dagiti makinaria ken dagiti kasapulan a masimpa kadagiti pasdek ken dadduma pay a pasilidad ti planta a panggepda a sublaten ti pannakaimaton ti operasionna.

Pinakalasda pay dagiti paset dagiti makina a kasapulan a maipasimpa tapno ibiaheda sadiay Italia para iti pannakarepairna.

“Kitaentayo amin a pamuspusan tapno agbiag met laeng ti planta a naggastusan ti probinsia. Saan ngamin a napintas ti pannakamaneharna idi. Bareng dagitoy Italian investors ti makapagballaigi iti daytoy ta ekspertodan iti kastoy a negosio,” kinuna ti gobernador.

Iti napalabas, sumagmamano dagiti nangsublat a nangimaton  iti planta ngem saan a nagtuloy ti operasionna gapu iti kakurang ti pondo ken nakurang a raw materials.

Kinuna ni Renato Ponzi a mangrugi ti operasion ti planta inton Enero inton umay a tawen gapu ta kasapulan ti naan-anay a panawen para iti pannakasimpa dagiti dadael a paset dagiti makinaria ken pannakadalus ti sibubukel a planta.

Segun ken ni Ponzi, umabot iti makabulan ti pannakaibiahe dagiti partes sadiay Italia ken makabulan manen iti pannakaisubli dagitoy.#