Footer

BANNER NEWS: Mannalon a kinautibo armado a tattao, nasarakan a naitanem

SALCEDO, Ilocos Sur – Kalpasan ti nasurok a makabulan manipud idi naireport a nagpukaw ti maysa a mannalon a mapapati a kinautibo dagiti armado a tattao, nasarakan idi Septiembre 9 ti agrupsan a bangkayna a naitanem iti kabakiran a sakup ti Barangay Atabay ditoy nga ili.

Positibo a binigbig ti kabsatna ni Nicolas Ramos y Valdez, 45, residente iti Barangay Poblacion ditoy nga ili, kalpasan a nakali ti bangkayna iti nakaitanemanna a dua a kadapan ti kaunegna babaen ti kallugong ken aruatna idi nagpukaw idi Hulio 24, 2010.

Idi makali ti agrupsan a bangkay ni Ramos, nabungon daytoy iti selopin ken mapapati a nagsagrap iti sugat iti ulona.

Naduktalan ti nakaitaneman ni Ramos babaen ti maysa a John Acosta a napan nagala iti uong iti nasao a lugar a nakakitaanna ti nagmuntuon a daga a dina impagarup a nakaitaneman ti biktima.

Mapapati a nagsuspetsa daytoy idi limmabas manen iti nadakamat a lugar ket nakitana a nagares-es ti daga gapu iti napalabas a panagtudona.

Saanen a naggawid pay ni Ramos manipud idi napan nakiraep iti Barangay Dinaratan ditoy met nga ili ket mapapati a kinautibo dagiti armado a tattao a masuspetsa a kameng ti New People’s Army.

Iti privilege speech ni Sangguniang Panlalawigan Member Robert Tudayan bayat ti sessionda idi Agosto 21, impalgakna ti naidanon a report kenkuana nga adda 20 nga armado a tattao nga agdakdakiwas kadagiti sumagmamano a barangay ti Salcedo, Galimuyod ken Santa Lucia a nagpabigbig a kameng ti NPA a nagdawat iti bagas ken dadduma pay a taraon, nagburasda iti mangga, ken nagkammelda kadagiti lapat iti asideg iti karayan iti Galimuyod ken nagtakaw iti baka ken kalding iti Salcedo ken Sta. Lucia.

Indagadag pay ni Tudayan ti pannakaimbestiga ti  panagpukaw ni Nicolas Ramos, residente ti Barangay Poblacion, Salcedo, Ilocos Sur idi pay la Hulio 24, 2010.

Ngem iti surat ti Alfredo Cesar Command/NPA-Ilocos a naipatangatang iti DWRS, imbatadna a saan nga aramid ti NPA ti mamutbuteng ken agtakaw iti pagbiagan dagiti umili kas ipabpabasol ti kasoldaduan.

“Iti kaanoman, saan nga aramid ti NPA ti mangkigkigtot, mangbutbuteng ken mangdangran iti masa aglalo ti agtakaw iti sanikua ken kabiagan ti masa ken pagbiagan ti masa…” kinuna ti ACC/NPA-Ilocos.

Pinakdaaran ti ACC/NPA-Ilocos ti publiko iti  isaysayangkat ti 50th IB, PA a “nasaknap ken kumarkaro a narugit a taktika” a mangpadakes iti imahe ti New People’s Army.

Kinuna ti surat a maysa a modus operandi ti “reaksionario a tropa” nga agpammarangda a kas NPA nga “agkikil, agtakaw,  mangal-allilaw, mangbutbuteng wenno mangdangran kadagiti masa a makasalaw kadakuada…”

Ngem iti interbiona iti radio, kinuna ni Staff Sargeant ti Philippine Army Marcelo Garcia a diversionary tactics tapno madadael ti imahe ti 50th Infantry Batallion ti pablaak ti Alfredo Cesar Command a ti kasoldaduan ti akin-aramid iti naireport a panagdadawat iti taraon, panagtakaw iti dinnguen, panagkalap iti lapat ken panagburas iti bunga ti mangga ken adda iti likudan ti panagpukaw ti maysa a mannalon a residente iti Barangay Poblacion, Salcedo, Ilocos Sur.

Kinuna ni Garcia a no adda operasion dagiti soldado, kumpleto ti probisionda para iti sumagmamano nga aldaw, kas panangkontrana iti alegasion ti Alfredo Cesar Command a ma-pan agdawdawat dagiti soldado iti taraon kadagiti tattao ken agtakaw iti kalding ken agkalap iti lapat.

Mainaig iti panagpukaw ni Ramos, kinuna ni Garcia nga idi maidanon ti report kadakuada, insigida a nangaramid dagiti opisialda iti tignay ken nakikoordinarda kadagiti local government units ken kapolisan para iti pannakabirok ti mapukpukaw a mannalon.

Kinuna ni Garcia a dagitoy a panagabuso ket mabalin nga aramid ti NPA tapno madadael ti imahe ti 50th IB, PA sana innayon a maysa daytoy a diversionary tactic iti biang ti NPA wenno Alfredo Cesar Command tapno “madadael ti napintas a gandat” ti kasoldaduan.

Kabayatanna, naidulin ti bangkay ni Ramos idi Sabado iti baet a saan pay a nalawag no asino dagiti nangkautibo ken nanggudas iti biagna.#

Comments are closed.