Footer

Dios ti agbati, Luzviminda (Tuloyna)

“Saan a mabalin!” timmangken ti timek ni Elias.

“Dayta ti pangngeddeng ti gobernador.”

“Mangtedak iti pawayway, Mr. Baluigas. Masapul a patgan ti gobernador ti kidkiddawenmi. No saan…” impangta ni Elias.

“Look, Malvar, simpatia ti gunggun-odenyo. No patuloyenyo ti panggepyo, lunod ti apitenyo.”

“Maysa laeng nga oras ti pawaywaymi, Mr. Baluigas!” intupak ni Elias ti auditibo.

“Malungsotkayo la ketdi iti pagbaludan, agtutubo,” kinuna ni Mayor de la Cuesta. “Di itulok ti gobernador a basakbasakenyo ti turay!”

“Agtalnaka!” imbugtak ni Elias.

Immanges ni Abel iti nauneg. Kasla dina patien a paayen ti gobernador ti kiddawda. Awan kadin ti kaes-eskan ti biag dagiti pasahero? Gabat la kadin ti kayariganda a makugtaran iti dalan?

Immapay iti panunotna ni Luzviminda. Kaanonto ti panagpatingga ti panagsagabana?

Immaweng ti transmitter. Ni Baluigas.

“Di agkir-in ti gobernador iti nalpasnan nga inkeddeng,” kinunana.

“Ultimatum daytoyen, Mr. Baluigas,” kinuna ni Elias. “Kalpasan ti maysa nga oras ket di baliwan ti gobernador ti pangngeddengna, saggaysaenmi a patayen dagiti pasahero.”

“Adda isingasingko, Malvar,” kinuna ni Baluigas. “Wayawayaanyo dagiti pasahero ket dakami ti mangsandi kadakuada.”

“Saankami a maag,” imper-ak ni Elias. Intupakna ti bagina iti tugaw. Narugit dagiti balikas a nagaon iti bibigna.

“Sumukokayo laengen, agtutubo,” kinuna ni Mayor de la Cuesta. “Bareng mapalag-anan ti basolyo.”

“Dimo ibbusen ti pasensiak, Mayor!” inkusilap ni Elias.

Kinalbit ni Abel ni Elias sana insenias ti panagpaknida. “Nasayaat ti singasing ni Baluigas,” nakunana. “Apay a dita awaten?”

“Saan a mabalin!”

“Dayta laeng ti pamuspusan tapno…”

“Dika agkammatalek iti turay. Ipaammalmo ti tanganmo ket sibubukel a takiagmo ti alun-onenna.”

Saanen a nagtimek ni Abel. Dina magustuan ti pagturongan dagiti pasamak. Nasken kadi a maiparukpok ti dara tapno matun-oyanda ti panggepda?

Dina napupuotan a naapiras ti piglat ti mugingna. Naalana ti piglat iti naminsan a panagdemonstrasionda.  Nadara daydi a demonstrasion. Narungsot dagiti nagtagibatuta a polis. Kayariganda ti kuton a dida ammo ti kumlebanda.

Nagwengweng ti transmitter. Nailasin ni Abel ti timek ti agiwarwarnak.

“Ladingitek,” kinuna ni Baluigas. “Saanen a mabalusingsing ti pangngeddeng ti gobernador.”

Namulenglengan ni Abel ti transmitter. Kellaat a sinippayot ti lawag: kasla karnero a maisakripisio dagiti pasahero iti altar dagiti nabileg!

“Look, Malvar, saan pay a naladaw ti amin. Sumukokayon tapno nalaglag-an met laeng ti dusayo. Nagsangpeten dagiti national newspapers. Namnamaek a makisimpatiada iti iruprupiryo a pannakarabngis ti kalinteganyo. Ammok a  maawatda ti sasaadenyo.”

“Dinak pagkatawaen, Mr. Baluigas. Sangsangkamaysa ti burik dagiti agtuturay. Agkikinnalubda agsipud ta agpapada a rinuker!”

“Saan amin nga agtuturay ket rinuker. Adu ti disente kadakuada, Malvar. Uray ti sangakaban a bagas, adda latta nailaok nga itta.”

Saan a nagtimek ni Elias. Ngem nairteng ti rupana a nangtaliaw kadagiti pasahero.

“T-tungpalem ti pangtam?” inamad ni Abel.

“Awan ti pagpilianta!”

Napatengngaag ni Abel idi limteng ti sirena nga umas-asideg. Immapiring iti tawa. Al-alikubkoben dagiti lugan ti eroplano. Dimsaag dagiti armado a soldado ket nagpuestoda. Nakasagana dagiti armasda.

Naguni ti transmitter. Ti provincial director.

“Naalikubkobkayo, Malvar. Sumukokayo a natalna tapno awan ti madesgrasia!”

Ginammatan ni  Elias ti auditibo.

“Papanawem dagiti soldadom, ,” impukkawna. “No saan….”

“Ladingitek, Malvar,” insungbat ni General Sison. “Sursurotek ti naibilin kaniak.”

“Didakam’ piliten a pumatay, General.”

“Bilin ti bilin. Masapul a tungpalek.”

“Karkaritendakami, ha!” intupak ni Elias ti auditibo. Kellaat a ginammatanna ni Mayor de la Cuesta.

“A-ania ti aramidenyo kaniak?” nagtigerger ti timek ti mayor.

“Malasmo. Dakami ita ti berdugo a mangungaw iti kinadakesmo, Mayor de la Cuesta!”

(Maigibusto)

Comments are closed.