Footer

EDITORIAL: Ti leksion ti hostage taking

Adun dagiti agsisimparat a kapanunotan a naibatad mainaig iti hostage taking itay nabiit a nakatayan ti siam a tao a pakairamanan ti hostage taker. Kanaig daytoy, limtuad dagiti kritiko a nangbabalaw ken ni Pres. Benigno Aquino III ken dagiti opisialna iti Gabinete gapu iti saan a makapnek a panangrisutda iti problema nga impaay ti situasion a nagtungpal iti trahedia.

Imbilag ti nasao a hostage taking ti kinakurang ti eksperiensa ni Pres. Aquino ken dagiti kameng ti Gabinetena nangruna ti dadaulo ti Department of Interior and Local Government a sumango iti maysa a dakkel a parikut a kas iti pannakahold-ap ti bus a nagluganan dagiti turista nga Intsik a nagbalin a drama iti pudno a biag a nabuya pay ti sibubukel a lubong.

Ita, agpipinnasa dagiti opisial a nakaipabaklayan iti naannayas a negosasion tapno maiyadayoda iti nakaro a pannakababalaw iti makuna a palpak a pannakakisarang iti hostage taker. Saan a maikkat ti pannakakritikar ni Pres. Aquino uray iti baet ti panangikalintegan ti Malakaniang a saan a nagbaybay-a a nangmonitor iti mapaspasamak babaen ti telebision ken dagiti report manipud kadagiti napusgan a mangannong iti pannakarisut iti naparnuay a krisis.

Ala, saankamin nga aggandat a sumagpaw pay iti isyo agsipud ta pagaammomi a kaslan sandia a napespes amin a “tubbogna” nga iti pammaliiwmi, di met makaited iti naan-anay a solusion tapno saanton a maulit pay ti nakaam-ames a napagteng iti masakbayan.

Ti laeng masaritami, isardeng koma dagiti kritiko ken agtuturaytayo ti agtitinnudo no asino ti rumbeng a mataltal iti saan a makapnek a resulta ti hostage taking. Ad-adda laeng a pakaibabainan dagiti agtuturaytayo ken ti kapolisan no kastoy ti maar-aramid.

Saantayon a maisubli pay ti napasamak. Ti ket aramiden dagiti agtuturaytayo ti panagtugawda sada analisaren dagiti nagkamtudan iti negosasion ken dagiti rumbeng koma a naaramid iti dayta a situasion tapno nalapdan ti pannakagudas dagiti biag.

Kasapulan met ti kapolisantayo ti nasamsamay a wagas a panangrisut iti problema ti hostage taking.  Kasta met a nakadidillaw la unay ti kaawan ti naan-anay a ramit dagiti polis kas koma iti night goggles a naaramatda koma tapno makitada ti hostage taker idi panggepda a serken ti bus.

Kinapudnona, adu dagiti naparupanget idi naammuanda a nagpraktis pay dagiti polis sakbay a timmapogda iti “gubatan”.  Makunami: sabali ti maadal kadagiti libro wenno masanay kadagiti workshop iti mapasamak iti pudno a biag.#