Footer

Film festival, naangay iti MMSU

BATAC CITY – Iti umuna a gundaway, naangay ditoy siudad ti maysa a festival a nakaipabuyaan kadagiti partuat a pelikula ti dua a nangab-abaken a Filipino a writer-directors.

Naipabuya bayat ti Cinemajarlika Film Festival 2010 ti tallo a pelikula ni Byron Bryant ken maysa nga ababa a pelikula ni Raymond Red, dua a nalatak a Filipino film makers a nangab-abaken ti pelikulada kadagiti film festivals ditoy pagilian ken iti ballasiw-taaw.

Karaman dagiti pelikula ni Bryant a naipabuya iti Teatro Ilocandia ti Mariano Marcos State University ti “Baryoke”, “Rotonda”, ken “Alon”,  ken ti “ Anino”, maysa nga ababa a pelikula ni Raymond Red.

Naipabuya idi Set. 9 ti “Baryoke” (9:30 a.m.), “Rotonda” (1 p.m.) ken “Alon” (3 p.m.).  Nangabak iti best cinematography idi 2005 iti Cinemalaya Film Festival ti “Baryoke”, maysa kadagiti 10 finalists iti Cinemalaya idi 2006 ti “Rotonda” ken naidaydayaw met ti “Alon” a naaramid idi 2008.

Iti bigat ti Septiembre 10, naglektiur da Juan S.P. Hidalgo, Jr. maipanggep iti panagsurat iti screenplay, ni Byron Bryant maipanggep iti film directing, ken aktor Ronnie Lazaro mainaig iti film acting.  Ni Ronnie Lazaro ti bida iti “Baryoke” ken “Anino”.

Iti malem, naipabuya ti “Anino”  (1 p.m.). Nangabak iti Palme D’Or for  best short film ti Anino iti 2000 Cannes International Film. Binukibok daytoy a pelikula a nagbidaan da Eddie Garcia, Ronnie Lazaro ken John Arcilla ti dumakdakkel a giwang iti nagbaetan dagiti baknang ken nabibileg maikontra kadagiti babassit.

Kinuna ni Dr. Miriam Pascua, presidente ti MMSU a maragsakan agsipud ta ditoy a pagadalan ti nakairubuatan ti naangay nga Independent Film Festival iti Amianan a Luzon ket impatalgedna ti naan-anay a suportana iti daytoy naisangsangayan a proyekto.

Ni Dr. Joselito Lolinco, dekano ti College of Arts and Sciences ti nangimaton iti nasao a festival babaen ti tulong da Dr. Aianree Raquel ken tallo nga organisasion dagiti estudiante a pakairamanan ti CAS Student Council, AB English Studies Society, ken Association of Students in Humanities, English and Literature.

Malaksid dagiti estudiante ti MMSU, nakipagbuya dagiti estudiante ti University of Northern Philippines ken ti publiko a managayat kadagiti independiente a pelikula nga aramid dagiti Filipino ditoy pagilian.#

Comments are closed.