Footer

Tricycle driver, negosiante, ginudas riders in tandem

CANDON CITY – Nagudas ti maysa nga agpaspasada iti traysikel ken maysa a bakla a negosiante babaen dagiti armado a tattao a nagkalubbon iti motorsiklo iti nagsina a pammapatay idi Septiembre 6 ken 7.

Sigida a natay ni Felix Rabena y Ragamat, 29, naasawaan, residente iti Barangay Paratong, Sta. Catalina, Ilocos Sur idinto a naideklara a natayen iti St. Martin de Porres Hospital ni Rolando Calindas Jr. y Gallano, 35, baro, bakla, barangay kagawad ken residente iti Barangay San Agustin ditoy kalpasan ti pannakapaltogda.

Dagus a natay ni Rabena gapu iti sugatna iti ulona gapuanan ti cal. 45 iti pammaltog a naisayangkat iti agarup alas 6 ti bigat ti Septiembre 7 iti Barangay Paratong, Sta. Catalina, Ilocos Sur..

Segun iti inbestigasion dagiti polis, imparking ni Rabena ti traysikelna iti sanguanan ti maysa a waiting shed iti nadakamat a barangay idi nagsardeng iti asidegna ti dua a lalaki a naglugan iti Honda a nangisit a motorsiklo sada pinaputokan ti biktima.

Naglibas dagiti suspek a nagturong iti laud a direksion.

Nakarekobre dagiti polis iti 7 a kapsula iti nakapasamakan ti krimen.

Di pay ammo ti motibo ti pammapatay.

Kabayatanna, napapatay ni Calindas iti asideg ti Dappat bridge iti nagbedngan ti Barangay San Antonio ken San Agustin ditoy siudad iti agarup alas 6 ti malem ti Septiembre 6.

Nakalugan ni Calindas iti motorsiklona ket idi makadanon iti nadakamat a lugar, nagparang a kellaat dagiti suspek a nagkalugan iti motorsiklo sada pinaputokan ti biktima iti sumagmamano a daras a nakapuruan iti tian ken kanawan a biceps daytoy.

Segun dagiti di nainaganan a saksi, nakaluban ti kagudua ti rupa ken anteohos ti gunman.

Dua a kapsula a di pay ammo ti kalibrena ti narekobre dagiti polis iti nakapasamakan ti krimen.

Kitkitaen dagiti inbestigador ti anggulo nga adda pakainaigan ti negosio ti motibo ti pammapatay agsipud ta nangipila ti biktima iti kaso maikontra iti dua nga empleadona gapu iti mapapati a saanda a panagiremit iti koleksionda.#