Footer

100 nagturpos iti reflexology

VIGAN CITY – Naggigiddan a nagturpos ti lima a batch dagiti estudiante iti Basic Reflexology and Therapeutic Massage Course iti graduation rites a naangay iti Baluarte ditoy siudad  idi Setiembre 13 .

Inesponsoran ti gobierno probinsial nga idauluan ni Gov. Luis “Chavit” Singson, Salinong ti Ilocandia Association Inc. ken ti Technical Education and Skills Development Authority (TESDA) ti nasao a kurso.

Umabot iti 100 dagiti naikkan iti sertipiko ti panagturpos kalpasan a nagun-odda ti nailatang nga oras ken bilang ti pasiente a mailut a kasapulan tapno pumasa iti kurso.

Kinuna ni Singson a saan a nababa a klase ti inadal dagiti nagturpos ta adu ti agkasapulan iti masahista iti ballasiw taaw.

Innayon ti gobernador a kasapulan laeng dagiti nagturpos ti sinseridad iti panagserbi ket sigurado nga agballigida idinto nga inyunay-unayna a kasapulan nga agtultuloy ti panangipakatda kadagiti nasursuroda tapno maaddaanda iti naan-anay a padas.

“Ipasiguradomi a saan nga agpatingga ditoy ti panangtulongmi kadakayo no di ket agingga iti maisapulyo dagiti naadalyo,” impasingked ti gobernador.

Dinayaw met ni Joel Pilotin, OIC provincial director ti TESDA, daytoy a proyekto ti gobierno probinsial gapu ta babaen itoy, umadu dagiti  kakailian a maaddaan iti pagsapulan. Inkarina ti pannakikoordinarna iti mangimaton iti kurso tapno maisayangkat ti competency assessment.

“Kitaentayo no adda met la nasursuro dagiti nagturpos babaen ti competency assessment, ket maikkan dagiti makapasa iti certificate of competency. Babaen itoy, makatulongkami a mangbayabay iti panagsapulyo iti trabaho,” kinuna ni Pilotin.

Inrekomenda pay ti TESDA director a mapaadda koma met ti maysa pay a training center iti maikadua a distrito a pakaisuruan ti masonry, carpentry ken panagpinta iti pasdek.

Kabayatanna, kinuna ti trainor a ni Edwin Antolin a maysa a kita ti alternative medicine ti panagmasahe.

Kinunana a maysa a wagas ti panagagas ti panagmasahe nga awan ti ipatomar nga agas no di babaen laeng ti pisel. Inwaragawagna a maisaruno a dagus ti maikanem a batch kalpasan ti graduation ti immuna a lima a batches.

“Ti laeng iyunay-unayko kadagiti nagturpos, awan koma ti diskriminasion iti pasiente. Adda man wenno awan kuartana no agkasapulan masapul a tamingenyo,” indagadag ni Antolin.#

, ,

Comments are closed.