Footer

BANNER NEWS: Mopping up operation kontra nakaengkuentroda nga NPA, isaysayangkat ti PA

STA. LUCIA, Ilocos Sur – Madama ti mopping up operation dagiti tropa ti gobierno iti kabambantayan kadagiti nakaengkuentroda a local communist terrorists idi Septiembre 10 a nakatayan ti maysa a soldado ken maysa a sibilian.

Napasamak ti rinnupak iti nagbaetan ti kasoldaduan ken dagiti kameng ti NPA iti nagbeddengan ti Barangay Sapang ken Pila East ditoy nga ili iti nasurok nga uppat nga oras manipud iti alas 10:30 agingga iti alas 2:00 ti malem ti Septiembre 10 idi makaengkuentro dagiti  tropa ti Philippine Army ti dakkel a grupo dagiti kameng ti NPA kalpasan a nasaep ti militar ti kaadda ti plenum dagiti komunista a gerilia a naisayangkat iti nadakamat a barangay.

Nagudas iti nasao a rinnupak ni Sgt. Wilson Wagayen, ken maysa a sibilian a managan Elmer Valdez, residente iti Barangay Conconig East, ditoy nga ili a nasarakan ti bangkayna kalpasan ti tallo nga aldaw.

Madama ti beripikasion no kameng ti NPA wenno biktima ti sibilian iti naiwawa a bala.

Awan ti naireport a narsing iti biang ti NPA ngem posible nga adda nasugatan kadakuada gapu kadagiti dara a nakita iti naggianan dagitoy bayat ti rinnupak.

Naibilin iti kapolisan ti panangmonitorda no adda naipaagas a kameng ti NPA kadagiti ospital wenno klinika iti lugar a responsibilidadda ken iti panangiwayatda iti checkpoint.

Maysa nga Air Force helicopter ti naireport a napuoran gapu iti mekanikal a problema ken emerhensia a simmanglad iti Barangay Nagrebcan, ditoy met laeng nga ili. Nupay kasta, saan a naan-ano da Capt. Alvin John Gador, piloto, PAF; ti ko-pilotona a ni Lt. Edbert L. Ngina, Ssg. Alfredo Pabillo ken AIC Herchil Ibones.

Kabayatanna, mismo a ni General Rommel Gomez ti 5th Infantry Division, kaduana ti sumagmamano a kameng ti media, ti simmang-at iti nakapasamakan ti engkuentro ken nangisayangkat iti inspeksion iti lugar a mapapati a nakaangayan ti taripnong dagiti dadaulo ti NPA.

Iti interbio ti DZTP Radio Tirad Pass ken ni Gomez, kinunana nga agarup 50 nga NPA ti kinarupak ti tropa ti 86th Infantry Battalion, PA nga indauluan ni Col. Simon.

Iti inisial a report a simmangpet iti provincial police office, mapapati a nakaengkuentro dagiti soldado ti gobierno ti LCTs/NPA iti babaen ti ICRC nga indauluan da Renato Emannuel Amolot, Esteban Manual @Bonnie, Promencio Cotez @ Zegna, Gloria Floresca @ Eloy, Rodolfo Amistad @ Bellos, Eleonor Ortega @ Agnes, Fidel Gumpad @ Ricky ken Reynante Alabag @ Joey.

Karaman dagiti nabati dagiti NPA idi naglibasda bayat ti rinnupak ti laptop, sumagmamano a selpon, paltog, USB, video camera, luplupot ken nadumaduma a libro, bandera ti NPA ken dagiti subersibo a dokumento.

Mapapati a dimmar-ay iti nasao a plenum dagiti dadaulo ti NPA tapno tratarenda ti operasionda iti Ilocos.#

, ,