Footer

Barangay Nutrition Scholar ti Sto. Domingo, napadayawan

VIGAN CITY – “Saan koma nga agpatingga dagiti inna a mangsapul iti naimas ngem nasustansia a potahe tapno saan laeng a mapnek ti panagraman (tastebuds) no di pay agtalinaed ti kinasalun-at ti pamilia,” daytoy ti kinuna ni Vice Gov. Deogracias Victor “DV” Savellano bayat ti provincial nutrition culmination activities  iti kapitolio idi Setiembre 14.

“Masapul ti inobasion iti sidaen ken pangmerienda nga idasar iti lamisaan tapno makatulong iti pannakaiyestablisar ti nasalun-at a komunidad,” kinuna ti bise gobernador.

Kabayatanna, napili kas most outstanding barangay nutrition scholar iti Ilocos Sur ni Perla Tubalina ti Nalasin, Sto. Domingo.  Kadua ni Tubalina a napadayawan da Macrina Saturno ti Bonifacio, Cabugao; Maricel Mendoza ti Cadacad, Burgos; Aurora Lagmay ti Poblacion Sur, Santiago ken Charito Berciles ti Suysuyan, Lidlidda para iti maikadua agingga iti maikalima a puesto kas panagsaganadda.

Napadayawan met ti ili a Cabugao kas Green Banner awardee ita a tawen kalpasan a nailistada ti kabassitan nga insidente ti malnutrision iti sibubukel a probinsia. Nagpuesto met iti maikadua agingga iti maikalima dagiti ili a Burgos, Sto. Domingo, Lidlidda ken Cervantes.

Iti cooking contest, nangabak ti Galimuyod, sinaruno ti Santiago ken San Vicente. Inyawid met ni Analiza Laoad (San Emilio) ti umuna a puesto ti nutri quiz para kadagiti inna idinto a maikadua ni Alona Ebol (Galimuyod) ken maikatlo ni Zenie Abrencillo (Bantay).

Iti daytoy met la nga okasion, inikkan ni Vice Governor Savellano iti premio a P3,000 ni Zenie Abrencillo, maysa nga ina nga agtawen iti 24 ken taga-Cabusligan, Bantay kalpasan a naammuan ti bise gobernador a nakaimula daytoy iti 29 a pinuon ti marunggay iti arubayanda. Sipud pay idi 2001, inwarwaragawagen ni Savellano ti nainsaknapan a panagmula iti marunggay kadagiti arubayan gapu ta nasustansia daytoy a nateng.

Iti BArang-ay Demofarm iti San Juan, mapapaadu ti seedlings ti marunggay a maiwaras kadagiti barbarangay iti probinsia.#