Footer

Drug personality, 2 sabali pay, ginudas dagiti armado a riding in tandem

BANTAY, Ilocos Sur – Tallo manen dagiti pammapatay ditoy probinsia nga insayangkat dagiti armado a tattao a nagkalubbon iti motorsiklo.

Nagsasaruno a napaltogan a puon ti nakatayanda da Bernal Casiano y Ibbay iti Cabugao, Ilocos Sur, ni Emmanuel Basconsillo y Balallo iti Narvacan, ken Rowena Pipo y Ramos iti Bantay babaen dagiti armado a lallaki a riding in tandem.

Idi agarup alas 2:20 ti malem ti Septiembre 12, ginudas ti dua a lalaki a naglugan iti XRM motorcycle ni Casiano, 38, naasawaan, fish dealer, residente iti Barangay Teppeng, Sinait, Ilocos Sur bayat a nakalugan daytoy iti traysikelna, kaduana dagiti annakna a babbai.

Naitaray ni Casiano iti Suero General Hospital ngem indeklara ti nangatendar a doktor nga awanen ti biagna. Nakarekobre dagiti polis iti 3 a kapsula a nagtaud iti cal. 45 iti crime scene.

Di nabigbig dagiti pimmatay kenkuana ken di pay ammo ti motibo ti pammapatay.

Idi agarup 6:40 ti bigat ti Septiembre 14, naireport a pinaltogan a puon ti nakatayanna ni Basconsillo, 57, naasawaan, vendor, residente ti Barangay Magsaysay, Santa, Ilocos Sur.

Iti inisial nga inbestigasion dagiti polis, agdaldaliasat ni Basconsillo iti national highway a sakup ti Barangay
Sulvec, Narvacan, Ilocos Sur idi linabsan dagiti suspek a nagkalubbon iti motorsiklo kagiddan ti panangpaltog ti back rider kenkuana a nagsagrapan ti biktima iti sugat iti likudna a dagus a nakatayanna.

Madama ti inbestigasion mainaig iti daytoy a pammapatay.

Idi agarup alas 12:30 ti malem ti Septiembre 15, pinaltogan ti dua a lalaki a naglugan iti saan a nabigbig a motorsiklo ni Rowena Pipo y Ramos, naasawaan, natibo ti Nueva Ecija bayat ti ididissaagna iti naglugananna a traysikel iti sanguanan ti balay ni Marissa Ramilo y Gadinan iti Zone III, Bantay, Ilocos Sur.

Nagsagrap ni Pipo iti sugat iti paset ti bagina  ket naitaray iti Metro Vigan Cooperative Hospital ngem indeklara ti attending physician a natayen daytoyen.

Nakarekobre dagiti inbestigador iti dua a kapsula a nagtaud iti cal. 45 iti nakapasamakan ti krimen.

Kinuna ti drayber ti traysikel a dina nabigbig dagiti suspek gapu iti kigtotna.

Nangisayangkat dagiti polis iti dragnet operation ngem saandan a nasapulan dagiti suspek.

Segun iti polis ditoy nga ili, adda naipila a kaso ti biktima mainaig iti droga ken nakabalud ti asawana gapu iti maiparparit a droga.

Iti pannakaisurat daytoy, awan pay ti suspek iti nasao a pammapatay.#