Footer

EDITORIAL: Pangrugian ti panagbalbaliw

Saantayo koma a barengbarengen daytoy masungad a panagpipili dagiti barangay officials agsipud ta ti barangay ti maibilang a pondasion ti panagituray iti pagilian. Isuda ti maibilang a kababaan a tukad iti istruktura ti natalged, natalna, nadur-as ken nademokrasiaan a panagtaray wenno panangituray iti gobierno.

Nakaladladingit ta iti kallabes a panagpipili, nakigamulo dagiti politiko iti pannakaibutos dagiti barangay officials. Mabalin a paglibakanda daytoy ngem saanda a mailimed nga adda dagiti barangay officials a minanokda tapno dagitoy ti agmayoria maikontra kadagiti nagpaidasig a mapaliiw nga addaan iti kabukbukodan a takder ken prinsipio a mabalin a saan a mainakeman wenno magemgeman dagiti lokal nga agtuturay.

Ta kinapudnona, annugoten man wenno saan dagiti town ken provincial chief executives, kasapulanda dagiti kapitan ken kagawad tapno nasaysayud ken naannayas ti pannakaipagna dagiti programa ken proyektoda. Dagiti kapitan ken kagawad ti kangrunaan nga instrumento ken paratignay kadagiti aniaman a sirmata ken bision ti maysa nga ama ti probinsia wenno ili. Kasapulanda dagiti kapitan ken kagawad a sidadaan nga agtungpal ken mangipatungpal iti aniaman a tarigagay, interes wenno direksion ti panangiturayda.

Annugotenda man wenno saan, ken iti baet a nalawag nga ibatbatad ti Local Government Code nga apolitical (saan a malaokan politika) ti dagiti barangay officials, saan nga agtengtengnga dagiti chief executives no di ket adda dagiti manokenda a paidasig a barangay officials iti eleksion. Iti sabali a bangir, saan a mailibak nga adu dagiti barangay officials nga agtaray kadagiti politiko tapno laeng agtuloy ti panangiturayda iti barangay uray arigna iluada ida dagiti kabarangayanda.

Nakuna ni Pres. Aquino a kasapulantayon ti panagbalbaliw. Irugitayo ngarud ti panagbalbaliw babaen ti panangkalbittayo kadagiti politiko a saanda koma a bumiang iti masungad nga eleksion dagiti barangay officials. Bay-anda koma a dagiti talaga a kayat dagiti umili a mangituray kadakuada ti rummuar iti balota. Saanda koma a limed a suportaran wenno iduron ti kandidatura ti maysa a barangay kapitan nga awan met ti ammona no di laeng ti kumpet iti pantalon ti politiko nga apona.

No kayat dagiti umili nga adda panagbalbaliw iti pannakaituray iti barangayda, agbalinda koma a bihilante tapno saan a magamsaw ti pudpudno a rikna ken tarigagayda. Agridamda koma ken saanda nga itulok a dagiti politiko ti mangikeddeng no asino ti mangabak iti eleksion wenno mangituray kadagiti barangay.

Sika ti pangrugian ti panagbalbaliw, kabarangayan!

Comments are closed.