Footer

Ilocos Sur Hymn, makanta iti pagadalan, radio ken telebision

VIGAN CITY – Agbalinen a requirement kadagiti amin a pagadalan, kolehio, unibersidad, ken amin nga opisina ti gobierno ti pannakairaman a makanta ti Ilocos Sur Hymn tunggal flag raising ceremony ken importante nga okasion idinto a kasapulan met a patokaren daytoy iti sign on ken sign off dagiti amin a radio ken local TV stations iti probinsia.

Maipatungpalen daytoy kalpasan nga inaprobaran ti hunta probinsial iti session idi Setiembre 14 ti resolusion ni SPM Christian Purisima a mangkidkiddaw iti pannakakanta ti Ilocos Sur Hymn gapu iti obserbasion a bumasbassit ti makaammo iti daytoy nga anthem ti probinsia.

Kanaig daytoy, inaprobaran pay ti hunta probinsial ti umasping a resolusion nga impila ni Vice Governor Deogracias Victor “DV” Savellano a mamagbalin a requirement iti asinoman nga aplikante iti aniaman a posision iti gobierno probinsial ken dagiti aplikante iti promosion nga ammoda a kantaen ti Ilocos Sur Hymn ken Awit ng Serbisio Sibil ken kasapulan a maikabesada ti Panunumpa ng Kawani ng Gobierno sakbay a mairuar ti appointment dagitoy.

Kabayatanna, aprobado metten iti hunta probinsial ti ordinansa ti ili a Sigay a mangiparit  nga agpasada iti ili dagiti pampasahero a dyip  nga awanan iti LTO registration ken lisensiado a drayber; dagiti ordinansa ti Sugpon a mangpaadda iti Public Information Board ken ti Fire Safety Board iti munisipio; resolusion ti ili a Santa a mangpaadda kadagiti baro a posision a maibilang iti career service first level classification iti sumagmamano nga opisina ken departamento iti LGU ti Santa ken ti pannakapataud iti kasapulan a pondo para iti sueldo ken amin a benepisio ken alawans; ken ti resolusion ti ili a Magsingal a mangaprobar iti implementasion ti supplemental budget manipud iti 20% development fund ti ili.#