Footer

KOMENTARIO: Dagiti bangen a sanguen ti Truth Commission (Maudi a paset)

Kadagiti asideg iti Malakaniang, narigatda a maawatan no apay a kueskuestionaran dagiti kaaliado ni dati a Presidente Gloria Arroyo ti pannakabukel ti Truth Commission. Ngamin kas nadakamaten iti kallabes nga isyo daytoy a salaysay, bayat ti panagtugaw ni Arroyo, adda met sumagmamano a “truth commission” a binuangayna ket saan met a nakuestionaran dagitoy. Apay nga ita ta nangbukel ni Pres. Aquino iti komision a kangrunaan a panggepna ti pannakaiparuar ti kinapudno mainaig dagiti mapapati nga anomalia ken panagkunniber dagiti agtuturay iti napalabas nga administrasion ket kuestionarandan ti konstitusionalidadna iti Korte Suprema?

Kas ken ni Negros Occidental Rep. Ignacio Arroyo, binabalawna ni presidential spokesman Edwin Lacierda gapu iti imbalikas daytoy a sardengan koma dagiti opisial ti napalabas nga administrasion Arroyo ti agipalapal kadagiti bangen para iti naannayas a panaggaraw ti Truth Commission a mangibuksil iti kinapudno.

Iti sabali a bangir, nupay mismo pay nga imbatad ni dati a Presidente Gloria Arroyo a saanna a lapdan ti pannakabuangay ti Truth Commission ket madadaan pay a tumulong tapno lumtuad ti pudno, no patien ti parasaona a ni Maria Elena Bautista Horn, sabali met ti tignay dagiti kaaliadona iti Kamara ta agparparang a mangikabkabilda kadagiti bangen tapno saan a makagaraw ti Truth Commission.

Ibagbaga ita ni House Minority Leader Edcel Lagman a supsupiatenda ti Truth Commission saan a gapu ta adda butengda iti mabalin a lumtuad bayat ti panagpalutpot daytoy no di gapu (kano) ta induron ida ti “pagrebbenganda a mangitag-ay iti Konstitusion ken iti panagturay ti linteg”.

Kasta met saanda (kano) a kueskuestionaran ti Truth Commission tapno lappedanda ti inbestigasion ken prosekusion dagiti opisial ti administrasion Arroyo gapu kadagiti mapapati a nakaisawsawanda nga anomalia  no di gapu ta mabalin met dagitoy nga agdalan iti nasao a proseso babaen ti agdama nga ahensia ti Department of Justice ken ti Ombudsman nga addaan iti bileg nga aginbestiga ken mangdusa.

Ngem ken ni Justice Secretary Leila de Lima, saanen a nasken a maputar ti linteg a mangtakder iti pannakabuangay ti Truth Commission agsipud ta maysa daytoy a fact-finding body ket agirekomenda laeng ti bilegna.

Kinuna ni de Lima a saan daytoy a maysa a body a mangkeddeng no nakabasol ti maysa nga agtuturay wenno saan idinto a impettengna nga addaan ti komision iti bileg a mangbilin kadagiti tattao nga agatendar kadagiti hearings ken makikooperar iti inbestigasion wenno panagpalutpot.

Apay a saantayo nga ikkan ti truth commission iti gundaway a mangtunton iti kinapudno? kinuna pay ti justice secretary.

Ngem saan latta a nagpangadua ni Lagman, napinget a kaaliado ni Arroyo, ken maysa a Louis Biraogo (?) a nangipila iti petision iti Korte Suprema a nangkuestionaranda iti konstitusionalidad ti executive order nga impaulog ni Pres. Aquino a nangbuangay iti Truth Commission.

Mapadpadaanan ngarud ti pangngeddeng ti Korte Suprema. Aniaman ti desision: agtultuloy ti saludsod: kaanonto a mawaknitan ti bangen tapno lumtuad ti kinapudno?#

, , ,