Footer

Suspek iti pammapatay, naarmalait, natay

CANDON CITY – Kitkitaen dagiti polis ti anggulo nga adda pakainaigan ti kasona ti pannakagudas itay lawasna ti baro a kangrunaan a suspek iti maysa a pammapatay ditoy siudad.

Napapatay idi agarup 8:39 ti rabii ti Septiembre 14 ni John Rey Gambol y Absalon, masuspetsa iti pannakapapatay ni Rolando Calindas, Jr. y Gallano, 35, bakla, barangay kagawad ken residente iti Barangay San Agustin, Candon City.

Segun iti report a dimmanon iti provincial police office ditoy, mapan koma agpasiar ni Gambol, 19, baro, residente iti Barangay Villarica ditoy siudad, iti balay ti gayyemna idi pinarakapak ti di nabigbig a tao.

Nagsagaba ni Gambol iti sugat iti nagduduma a paset ti bagina ket naideklara a natayen idi maidanon iti St. Martin de Porres Hospital ditoy siudad.

Segun iti ama ti biktima, nadakamat ti anakna nga adda nangsurot kenkuana a nakabonite a lalaki idi mapan gimmatang iti arak ket pinaritanna nga umulog iti dayta a rabii ngem nagtuloy met latta ti biktima.

Sinurot ti ama ti anakna ket segun kenkuana, idi makadanon daytoy iti panipngeten a paset ti kalsada, nakangeg iti timek a nagkuna a “hangka agtaray” a sinaruno dagiti kanalbuong. Nagtaray a nagsubli ti ama iti balayda sa nagpaarayat.

Nakarekobre dagiti nagresponde a polis iti 10 a kapsula ti M16 iti asideg ti nakapasagan ti biktima.

Suspek ni Gambol iti pannakapapatay ni  Calindas idi malem ti Septiembre 6 iti asideg ti Dappat bridge iti nagbedngan ti Barangay San Antonio ken San Agustin, Candon City. Saan pay a nabigbig ti kinalubbonna iti motorsiklo idi insayangkatda ti pammapatay.

Madama ti panagimbestiga dagiti polis mainaig iti daytoy krimen.#

Comments are closed.