Footer

BANNER NEWS: Kaso ti dengue iti Ilocos Sur, immabuten iti 700, 13 natay

VIGAN CITY – Immaboten iti pito gasut ti kaso ti dengue iti Ilocos Sur idinto nga addan sangapulo ket tallo a natay gapu itoy a sakit, daytoy ti  kaudian a report nga imparuar ti Provincial Health Team Office-Ilocos Sur a napetsaan ti Septiembre 20.

Sinaguday ti report a kaaduan a kaso ti nailista iti ili ti Cabugao nga addaan iti 81 a kaso ken 2 a natay; sumaruno ti Sta. Maria nga addaan iti 73 a kaso ken 3 a natay; Candon City nga addaan iti 68 a kaso ngem awan ti naireport a natay; 50 kaso ti nailista iti Suyo ken maysa ti natay; ken ti Narvacan nga addaan iti 47 a kaso.

Awan ti nailista a kaso ti dengue kadagiti ili ti Alilem, Sugpon ken Gregorio del Pilar.

Kanaig daytoy a problema, nagsasango idi Septiembre 21 dagiti mangimaton iti salun-at iti probinsia tapno mapagpapatanganda dagiti addang nga aramidenda tapno malapdan ti panagadu dagiti agbalin a biktima ti nasao a sakit.

Karaman kadagiti dimmar-ay iti taripnong dagiti representante ti Provincial Health Team Office, DepEd, DILG, Red Cross-Ilocos Sur, Provincial Social Welfare and Development Office, SPM Jerry Singson, chairman ti committee on health and sanitation  ti provincial board, ken Dr. Gerardo Lahoz, consultant ti provincial government iti benneg ti salun-at.

Iti eksklusibo a pannakiuman ti Around Ilocandia Channel ken ni Dr. Lahoz, kinunana a napagnunummuanda ti pannakaisayangkat ti Dengue Summit tapno maaddaan iti napagmaymaysa nga addang ti amin a sektor kontra iti sakit. Maangay daytoy inton Setiembre 30 iti kapitolio.

“Babaen ti panagsasango ti amin, maikabassittayo ti kaso ti dengue gapu ta saan laengen nga iti tiempo ti panagtudtudo a parikut daytoy a sakit no di pay ket iti sibubukelen a tawen. No adda koordinasion, nadardaras met a maisapulan iti kasapulan a dara dagiti biktima,” kinuna ni  Lahoz.

Naipasa metten iti hunta probinsial ti resolusion a pinutar ni Vice Governor Deogracias Victor “DV” Savellano a pannakaisayangkat iti Dengue Summit iti tinawen.#

, ,

Comments are closed.