Footer

EDITORIAL: Ti padagsen ti DepEd

Adda manen tignay a mangnayon iti tawen a panagbasa iti elementaria. Impalgak ti Department of Education itay nabiit a planona ti mangnayon iti maysa a tawen ti panagbasa iti elementaria.

Saanmi a kuestionaran ti kinasamay daytoy a plano ti DepEd. Mamatikami a sakbay nga impalgak ti dadaulo ti nasao nga ahensia, naikkan daytoy a plano iti naan-anay a panangadal.

Makunami pay ketdi nga awanen ti baro iti daytoy a panggep. Addan dagiti tignay iti kallabes a mangnayon iti maysa a tawen iti panagbasa iti elementaria wenno iti haiskul. Ngem nagpatinggada laeng a plano gapu ta napanunot siguro dagiti immuna a nangidaulo iti DepEd nga agtungpal laeng iti pannakapaay ti nasao a programa gapu kadagiti nagkaadu a limtuad a problema iti pannakaipatungpalna.

Saan a palimed a tinawen nga agkurkurang ti pondo a mait-ited iti DepEd nupay daytoy nga ahensia ti gobiero ti kangatuan iti mailatang a pondo. Gapu iti panagkurang ti pondona, tinawen a problema ti DepEd ti kakurang dagiti pagadalan, kurang a libro ken reading materials, kurang a desk, kurang a mangisuro, kurang a posision a maparnuay idinto nga umad-adu ti bilang dagiti agbasa.

No manayonan ti tawen a panagbasa iti elementaria wenno sekundaria, natural, kasapulan dagiti additional a mangisuro,  classrooms, desks, tables, chairs, libro ken dadduma pay. Kasapulan ngarud a manayonan ti pondo ti DepEd. Iti daytoy a tiempo a dandani nakiraudan ti “lakasa’ ti gobierno, pangalaanna ti kuarta a kasapulan? Problema la ketdi ti DepEd ken kangrunaanna, ti gobierno daytoy.

Iti sabali a bangir, no manayonan ti bilang ti tawen nga agbasa dagiti ubbing, kanayonan manen a busbosen dagiti nagannak. Iti daytoy a tiempo a karigat ti panagbiag, aggagal la ketdi dagitoy iti kanayonan a padagsen iti bulsada.

Ngem iti likudan dagitoy a problema, agdadata ti kinapudno a bimmaba ti kalidad ti edukasion iti pagilian. Kuna dagiti otoridad a maigapu daytoy iti kinakurang ti pondo ti DepEd.

Daytoy ti dilemna a sangsanguen ti dadaulo ti DepEd. Aniaman ti ipakatna, isu latta nga isu a dakkel a problema ti DepEd.

Makunami met, masapul a solbaren nga umuna dagiti dadaulo ti DepEd ti kinakurang ti pondo sakbay a mangipakat iti gannuat nga ad-adda laeng a mangpadagsen iti agdama a problema.#

Comments are closed.