Footer

Nang-hostage iti 3-tawenna nga ubing, bimmagsol pay iti polis

CANDON CITY – Iti mental hospital ti nakaipuruakan ti maysa a karpintero kalpasan ti panangtengngel ken panangipupokna iti maysa nga ubing nga agtawen iti tallo ken iti mapapati a pananggandatna a mangpatay iti maysa a polis bayat ti pannakaipupokna iti police station ditoy a siudad.

Pannakaremorderna gapu kadagiti problemana ken mapapati a kaadda ti suspetsana nga adda dakes a gandat kenkuana dagiti kakabagianna ti maipagarup a nangiduron ken ni Dominador del Rosario y Millan,  41, naasawaan, karpintero, residente iti Barangay Bagani Gabor ditoy a siudad, a nang-hostage iti tallo ti tawenna nga anak a lalaki ti kaanakanna iti Barangay Bagani Gabor ditoy siudad idi agsapa ti Septiembre 18.

Nangrugi ti hostage taking iti agarup alas 7 ti bigat ket nagpaut iti dua nga oras. Kinober ti media ti nasao a hostage taking a pakairamanan ti DZTP ditoy.

Mapapati nga inayaban ni del Rosario ni Allen James Calindas, Jr. y Gamisem, 3, ket inay-ayona a sumurot kenkuana ti ubing babaen ti panangitanggayana iti bibingka.

Impan ni del Rosario ti ubing iti comfort room sada nagpupok a dua babaen ti pananglansana iti ridaw ti CR.  Armado pay ti suspek  iti  kitchen knife nga agatiddog iti agarup 10 a pulgada.

Nagresponde dagiti polis ditoy siudad iti panangidaulo ni Chief of Police Supt. Marlo Castillo kalpasan a nakaawatda iti pulong manipud ken ni Barangay Captain Ernesto Calindas nga adda naisayangkat a panag-hostage iti barangayda.

Kinordonan dagiti polis nga  indauluan ni Castillo ti aglawlaw ti balay ken inrusatda ti negosasion para iti pannakawayawaya ti ubing.

Idinto a nakasaganada iti aniaman a mapasamak, impabus-oy dagiti polis iti pamilia ti hostage taker ken ni barangay Captain Calindas ti naalumamay a pannakipatang  kenkuana para iti natalna nga isusukona.

Idi inlukat ti hostage taker ti ridaw ti comfort room, nasirip ni Barangay Captain Calindas a nakadisso dagiti armas ni del Rosario ket ginundawayanna a tinengngel ti suspek agingga a naparukmana daytoy.

Impan dagiti polis ti suspek iti police station sada impupok.

Ngem iti rabii ti Septiembre 20, mapapati a nagremorder manen ti panunot ni del Rosario ket ginandatna a patayen ni PO1 Medward Galay bayat ti pannanganna ken sabali pay a polis.

Segun iti report, nagpakada ti suspek a mapan iti comfort room ket pinatgan met dagiti polis.

Ngem idi nagsubli ti suspek, kellaatna a binagsol ni Galay a nakasugatan daytoy iti takiag ken bakrangna.

Naitaray ti polis iti ospital para iti pannakaagas ti sugatna.

Saan a naireport no nakaalaan ti suspek ti kutsilio a pinangbagsolna ken ni Galay.

Kabigatanna, naibiahe ni del Rosario a maipan iti mental hospital.#

Comments are closed.