Footer

Pannakaited proteksion dagiti umili kadagiti agdakdakiwas armado a tattao, naidagadag

VIGAN CITY – Kasapulan ti panagtignay ti kapolisan ken kasoldaduan tapno maprotektaran dagiti agindeg kadagiti sumagmamano nga upland municipalities ditoy probinsia, daytoy ti bugas ti privilege speech ni Bokal Jerry Singson iti sessionda idi Septiembre 21.

Kinuna ni Singson a masapul a “maalarma ti kapolisan ken kasoldaduantayo” mainaig kadagiti mapaspasamak kadagiti dumaya nga il-ili iti maikadua a distrito ket agtignayda tapno maited ti proteksion dagiti agindeg kadagitoy a lugar.

Dinakamat ti bokal a nakaawat iti sumagmamano a mensahe babaen ti selpon a nangibuksil iti panagamakda mainaig kadagiti agdakdakiwas a “lampong nga armado a lallaki a nagtagiuniporme iti patig ken camouflage.

“Sino dagitoy a tattao?” sinaludsod ni Singson idinto nga innayonna a “kitaen koma ti PNP, Philippine Army ken aniaman a maseknan  dagitoy mapalpaliiw a kaadda dagiti agdakdakiwas nga armado a tattao tapno di maalarma dagiti umindeg ditoy probinsia.”

Maipalagip nga iti privilege speech ni Bokal Robert Tudayan, imbulgarna ti kaadda dagiti armado a tattao nga agdakdakiwas kadagiti sumagmamano a barangay ti Salcedo, Galimuyod ken Santa Lucia a nagpabigbig a kameng ti NPA a nagdawat iti bagas ken dadduma pay a taraon, nagburasda iti mangga, ken nagkammelda kadagiti lapat iti asideg iti karayan iti Galimuyod ken nagtakaw iti baka ken kalding iti Salcedo ken Sta. Lucia.

Segun iti bokal, mapapati a nagpulong dagiti agindeg iti CAFGU detachment iti Salcedo ngem saanda a naitaltalek.

Indagadag pay ni Tudayan ti pannakaimbestiga ti panagpukaw ti maysa a mannalon a managan Nicolas Ramos a napan nakiraep iti maysa a barangay iti Salcedo.

Nasarakan ti bangkay ni Ramos a naitanem ken natatek iti bala.

“Ditayo met ammo no soldado wenno NPA wenno tulisan ti nagaramid,” kinuna ni Singson idinto nga innayonna a “maalarma koma ti kasoldaduan tapno “itedda met ti naan-anay a proteksion a kasapulan dagiti umindeg ditoy probinsiatayo.”

Idi Septiembre 10, napasamak ti panagranget iti nagbaetan ti tropa ti gobierno ken dagiti local communist terrorists idi nag-engkuentroda iti nagbeddengan ti Barangay Sapang ken Pila East ti ili a Sta. Lucia.

Nagpaut iti uppat nga oras ti ranget a nakagudasan ti maysa a soldado ken maysa a sibilian.

Awan ti naireport a narsing iti biang ti NPA ngem mamati ti militar nga adda nasugatan kadakuada kas ipaneknek dagiti dara iti disso a naggianan dagitoy idi madama ti ranget.

“Kayatna a sawen, addada (NPA) ditoy,” nakuna ni Singson sana impaganetget nga “agdakiwas koma ti kasoldaduan tapno bugtakenda dagitoy nga elemento a mangmangted iti buteng kadagiti umili.#

, ,

Comments are closed.