Footer

Tobacco summit, naisingasing a maangay iti tinawen

VIGAN CITY – Tapno makita ti direksion a pagturongan ti industria ti tabako, naidatag iti sangguniang panlalawigan ti maysa a resolusion a maisayangkat ti tobacco summit iti tinawen ditoy probinsia.

Kinuna ni Vice Gov. Deogracias Victor Savellano a nangiproponer iti maysa a resolusion iti hunta probinsial a maisayangkat ti tinawen a tobacco summit iti probinsia sakbay ti tobacco season tapno adda proteksion dagiti agmulmula iti tabako no ania ti masakbayan daytoy kangrunaan nga industria ditoy probinsia.

Kinuna ni Savellano a napanunotanna a kasapulan nga adda tinawen a tobacco summit dagiti agmulmula ti tabako tapno maammuan ti direksion daytoy nga industria iti sanguanan ti panagkaduan ti Philip Morris ken Fortune Tobacco.

“Once a malpas ti resolusion, mangangay ti provincial government iti maysa a tobacco summit a pakaayaban amin a players, kangrunaanna dagiti tobacco farmers ken dagiti local officials tapno maammuan no ania ti direksion ti industria ken makapagsagana ti gobierno probinsial ken dagiti munisipio tapno  saanda nga agkatangkatang iti panaggatangan (iti tabako),” kinuna ni Savellano.

Panggep ni Savellano nga awisen ni kabarbaro nga NTA administrator Edgar Zaragoza a tumabuno iti nasao a tobacco summit a maangay inton Oktubre sakbay ti panagmumula iti tabako.

Iti tripartite meeting dagiti agmulmula iti tabako, traders ken manufacturers idi 2008,  babaen ti panangilungalong da Savellano, naipangato ti floor price ti tabako iti P10 kada kilo ken immabut iti nasurok a P90 kada kilo ti presio ti Class A a tabako.

Ngem idi napalabas a tobacco season, napaliiw ti kaawan ti kumpetision dagiti agparpartuat iti tabako ket saan unay a nagpangato ti presio ti tabako nga immabut laeng iti nakurang nga P80 kada kilo, malaksid a P5 kada kilo laeng ti naituon iti floor price daytoy a produkto.

“Kasapulan ti tinawen a tobacco summit tapno maammuan ti direksion ti industria ti tabako, kangrunaanna ket ditoy probinsia ti number one a producer ti tabako ken nagkaduan ti Philip Morris ken Fortune Tobacco,” kinuna ni Savellano.

Agtataud ditoy Ilocos Sur ti 70% iti kadagupan a produksion ti tabako kadagiti probinsia nga agmulmula iti tabako a pakairamanan ti Ilocos Norte, La Union ken Abra.#

, ,

Comments are closed.