Footer

Awan guardia, CCTV ti pawnshop a natakawan

CANDON CITY – Awan ti guardia ken awan ti naipasdek a closed circuit television camera ti Gemeline Pawnshop idi matakawan, daytoy ti natakuatan dagiti polis iti inisial nga inbestigasionda.

Saan la a dayta, pinagur-uray ti chief executive ti pawnshop dagiti nagresponde a polis iti dua ket gudua nga oras sakbay a nakastrekda nga aginbestiga iti uneg ti pawnshop.

Segun iti polis ditoy, dimmanon iti police station ti report a natakawan ti Gemiline Pawnshop a masarakan iti Barangay San Isidro, ket dagus a nagrespondedad ngem sa la napalubosan a sumrek ti SOCO team ken inbestigador iti uneg ti pagsaldaan idi simmangpet ni Rosalie Jimeno, chief executive ti pawnshop, a naggapu pay iti San Fernando City.

Mapattapatta a naisayangkat ti panagtakaw iti rabii ti Septiembre 25 agingga iti parbangon ti Septiembre 27.

Iti inisial nga inbestigasion dagiti polis, simrek dagiti mannanakaw iti shop babaen ti panangkalida iti tunnel iti kanal ti sewerage a mapattapatta nga 6 a metro iti daya ti establisimiento ken panangaramidda iti abut a 40 pulgada ti diametrona iti pavement iti asideg ti safety vault ket idi nakastrekdan iti pawnshop, pinorsarda a linuktan ti safety vault sada kinurimes dagiti naggianna.

Nakarekobre dagiti polis iti uneg ti pawnshop kadagiti rimienta nga inaramat dagiti mannanakaw a pakaibilangan ti crowbar, martilio, ken dadduma pay a digging tools.

Iti pannakaisurat daytoy, di pay ammo ti balor dagiti linaon ti safety vault.#

Comments are closed.