Footer

BANNER NEWS: Aksidente a nakatayan 3: ‘awan pabpaboranmi,’ kuna ti polis Sinait

SINAIT, Ilocos Sur – Awan ti pabpaboran ti kapolisan ditoy mainaig iti aksidente a nakainbolbaran ti maysa a drayber ti ABS-CBN, daytoy ti impaganetget ti hepe ti polis iti interbio kenkuana ti maysa a radio station itay nabiit.

“Awan ti pabpaboranmi; inaramidmi ti pagrebbenganmi,” kinuna ni Sinait Chief of Police Roy Rafanan kas reaksionna iti pammabalaw ni Konsehal Glen Guzman iti kapolisan ditoy mainaig iti panagimbestigada iti aksidente a nakatayan ti tallo a tao.

Natay da Daniel Savellano, y Serrano, 48, naasawaan; Jennifer Centinaje y Llegue @ Peter, 33, naasawaan, agpada a residente iti Barangay Magsaysay, Sinait, Ilocos Sur ken Rogelio Yarte y Ilmeng, 60, naasawaan, mannalon, residente iti Barangay Curtin, Sinait, Ilocos Sur idi mapapati a dinungpar ti patrol car ti ABS-CBN a minaneho ni Romulo Andres y Paet, 36, residente iti Barangay Purag, Sinait, Ilocos Sur, ti motorsiklo a naglugananda iti national highway a sakup ti Barangay Curtin, ditoy nga ili idi rabii ti Septiembre 26.

Kinuna ti hepe a naipilan ti darum a reckless imprudence resulting to multiple homicide maikontra ken ni Andres, pammaneknek nga awan ti al-alaen ti kapolisan ditoy nga ili. Naituding ti P50,000 a piansa para iti temporario a pannakawayawaya ni Andres.

Kinuna ti hepe nga adda dagiti nakasaksi iti pannungpar a nangitudo a ti service vehicle ti ABS-CBN ti nainbolbar iti aksidente ket daytoy ti mangpapigsa iti ebidensia maikontra ken ni Andres.

Mapapati nga ingguyod ti service vehicle dagiti biktima ken iti motorsikloda iti sumagmamano a metros.

Ngem iti interbio ni Guzman iti radio, kinunana nga adda suspetsana nga adda kadua ni Andres idi mapasamak ti aksidente idinto nga impeksana ti pannakadismayana iti agduma a report ti polis Sinait iti pudno a napasamak.

Kinuna ti konsehal a saan a pudno ti spot report ti polis a boluntario a simmuko ti suspek no di ket tinarayan daytoy dagiti nadungparna.

Segun iti drayber, immun-una a nadesgrasia dagiti biktima idi maatalanna ida. Ngem kinuna ni Rafanan nga adda naalada a palawag dagiti saksi a nakitada ti lugan ti ABS-CBN idi makangegda iti kanalbaag iti nakapasamakan ti aksidente.

Segun iti panagimbestiga ti polis, imbaba ni Andres dagiti kaduana a reporter ken cameraman iti Bantay, Ilocos Sur ket agmaymaysa a nagpa-Ilocos Norte tapno igarahena ti lugan iti estasion ti ABS-CBN.

Kabayatanna, iti statement nga imparuar ti ABS-CBN, impasingkedna ti naan-anay a kooperasionna iti agdama nga inbestigasion ti polis idinto nga impeksana ti pannakipagriknana kadagiti pamilia dagiti biktima.#

Comments are closed.