Footer

EDITORIAL: Alternatibo a panggedan

Iti report manipud iti opisina ti PNP regional director ti Region I, nagsardengen ti sugal a hueteng iti rehion uno.

Kas sinaguday ti report ni PRO1 Director Chief Supt. Orlando M. Mabutas, nangisayangkat ti kapolisan ditoy Region 1 kadagiti “awan-agsarday” nga operasion kontra hueteng ket napukawen daytoy illegal a numbers game kadagiti amin a 125 a siudad ken munisipalidad iti rehion.

Ngem ti nakaawis iti imatangmi ti maysa a paset ti report a nagkuna a naibatay ti report iti naisurat a sertipikasion dagiti lokal a chief executive, hepe ti polis ken/wenno dadaulo iti relihion nga awanen ti hueteng iti lugar dagitoy. Mabalin a pudno daytoy agsipud ta iti inaldaw-aldaw a panagrekoridami, awanen dagiti makitami a kobrador ti hueteng a nakaiggem iti polieto nga agwarawara kadagiti tiendaan, kalkalsada, publiko a lugar ken dadduma pay a pagdudupudopan dagiti tattao.

Ala, nasayaat met no agtultuloyen a mapukaw ti hueteng ditoy probinsia ken dadduma pay a paset ti pagilian nupay adda reserbasionmi gapu iti masirmatami nga epekto daytoy a pannakapukaw ti panggedan dagiti rinibu nga agpatpataya iti hueteng, kabo ken dadduma pay. Ita pay laeng, agrigaten dagitoy gapu ta awan metten ti panggedanda para iti inaldaw a panagbiagda.

Igunamgunammi ngarud iti gobierno ken ti simbaan nga agiwayat kadagiti measures tapno maikkan dagitoy napadisi a kailiantayo iti panggedanda tapno saan nga agbisin dagiti pamiliada. Madakamattayo ditoy ti kapaliiwanmi nga idi napadas a mapukaw ti hueteng iti pagilian ken naisardeng, adu dagiti naireport a kaso ti panagtakaw. Epekto la ketdi daytoy ti kaawanen iti panggedan dagitoy a kakailiantayo. No malipit ti maysa a tao, uray tadem kaptenna tapno laeng maisalbana ti biagna ken ti pamiliana.

Panggedan ti kaskenan ita a kasapulan dagiti kakailiantayo a napadisi iti pagsapulanda a hueteng. Daytoy koma ti ipangpangruna ti gobierno nga ikkan iti atension ken solusion. Masaludsodmi: ania ti maitedna ita a pannaranay kadakuada?

Saan koma nga aglaglagto lattan iti ragsakda ti simbaan wenno ti gobierno iti pannakapasardeng ti hueteng no awan met ti maitedna nga alternatibo a tulong kadagiti maseknan a kakailian. Maibturanda kadi a kitkitaen lattan ti panagrigat dagiti tattao tapno laeng mapukaw daytoy “immoralidad” nga aktibidad dagitoy marigrigat a kakailian nga agbibiag babaen ti sugal a hueteng?

Koma a no saan met nga umaw-awat ti simbaan iti donasion wenno limos manipud kadagitoy nangangato nga opisial wenno agtuturay a masuspetsa nga adda iti likudan ti hueteng iti lugarda.#

Comments are closed.