Footer

ITI INDAYON NI LAGIP: Nakasalda nga Ayat

Manipud idin, liniklikak ni Julius. No kasdiay nga agsabatkami iti dalan iti uneg ti pagadalan, kumalilisak.

Maysa a malem, diak nakaliklik kenkuana.

“Pakawanennak koma,” nakunana. “Diak ngamin nasarkedan ti riknak. Akuek a sineknannak iti panagimon idi makitak ti kinadekketyo ken ni Sir Marius.”

“Dakkel ti naitultulong ni Sir Marius tapno makaadalak,” nakunak. “Ngem inikkam iti sabali a maris iti panangtultulongna kaniak.”

“Dinak la kadin mapakawan?”

“Sige, pakawanennaka,” nakunak. “Diak kayat nga adda tao a manggurgura kaniak. Ngem no adda pay gandatmo nga ituloy ti panagrayom kaniak, ipakpakunakon: awan ti mauraymo kaniak.”

“Makaurayak,” kinuna ni Julius. “Ti importante ket nagun-odko ti pammakawanmo iti inaramidko.”

Kadagiti simmarsaruno a weekends, simmarsarungkar manen ni Julius kaniak iti baet ti nalab-ay a pannakisangok kenkuana. Imparupak payen nga ibaw-ingnan ti imatangna iti sabali a babai. Adu pay dagiti panggepko iti biag. Kayatko a tulongan dagiti dadakkelko. Kayatko a pagadalen dagiti kakabsatko. Iti agdama, awan pay ti kaimudingan ti ayat iti pusok. Ngem saan a namki kenkuana dagiti ublagko. Nagtuloy ti pingetna a manggun-od iti ayatko uray iti baet dagiti panangublagko kenkuana.

Ngem adda met sabali a nadlawko ken ni Sir Marius. Bimmattaway ti panagpasiarda nga agama iti kaserami ken ni Brenda. No dadduma, masalsaludsodko iti nakemko no ania ti makagapu. Gapu ngata iti pannakaranana ken ni Julius?

Ngem diak ammo ta kailiwko ti isasarungkarna kaniak. Mailiwak a makangeg iti timekna, ti nasarangsang a paggaakna ken iti panangipasiarna kadakami ken ni Stella nga anakna.
Maysa nga aldaw, adda inkissiim kaniak ni Brenda. Nagturong kano ni Ma’am Lyka iti opisina ni Sir Marius ket biniroknak. Naammuanna gayamen a bigat laeng ti panagtrabahok iti opisina ket agbasaak iti malem. Kinuna ni Brenda a nagsubangda nga agassawa. Pinabasol ti baketna nga adda relasionmi.

“Saan a pudno dayta!” nakunak. “Sika ti saksik nga awan ti kinapudnona dayta nga alegasion ni Ma’m Lyka.”

“Dimo maikkat ti panagsuspetsa ni Ma’am Lyka ta uray asino a makakita iti kinadekket kenka ni Sir Marius ket mamati la ketdi nga adda relasionyo.”

“Ania ti aramidek tapno maaturko dayta madi a panagipapan?” nakunak. “No ngata kasaritak ni Ma’am Lyka?”

“Ti kunam, patienna ti palawagmo? Ad-adda la ketdi nga agipapan nga adda ilemlemmengyo!”

Kasla agkakapsutak a nagtugaw. Ad-adda manen ti pannakariribukko idi ibaga ni Brenda nga impangta ni Ma’am Lyka a no dinak ikkaten ni Sir Marius, ageskandalo kano a masansan iti opisina ni lakayna!
(Adda tuloyna)

Comments are closed.