Footer

Nagsipdut iti simbaan, natiliw

VIGAN CITY – Uray uneg ti simbaan, saanen nga agbuteng dagiti mannipdut a mangibanag iti dakes a panggepda.

Impaima da PO3 Ronald Pilien, ken dagiti traffic aides a da Nelson Natividad ken Rodel Tolentino ni Jay Ann Quilinderino y Ragudo, 20, naasawaan, residente iti Barangay Tamurong, Caoayan, Ilocos Sur iti police station gapu iti panangsipdut daytoy iti bag ni Dominga Allagadan y Alcos, 63, balo, ken residente iti Barangay Raois, ditoy siudad idi agarup 10:25 ti aldaw ti Septiembre 26.

Naammuan iti inbestigasion a pinanawan ti biktima ti bagna iti tugawna idi mapan agkomunion ket ginammatan ti suspek ti bag sa naglibas nga immadayo ngem nasiputan ni Lilia Sunido y Allagadan, 41, kaanakan ti biktima, ket pinakdaaranna ti ikitna. Nagpatulong dagiti dua iti naka-duty a traffic aide officer ket kinamat dagitoy ti suspek agingga a naipiskutda iti nagsulian iti asideg ti McDonald.

Narekobre iti ikut ti suspek ti bag a naglaon iti dua a selpon model 1680 nga agpateg iti sag-P1,900 ken P6,790 a kuarta.#