Footer

3 lalaki, nagandat ti biagda

CABUGAO, Ilocos Sur – Naipilaan iti kaso ti tallo a suspek a nanggandat iti biag ti tallo a lalaki iti pammaltog a napasamak iti Barangay Pug-os ditoy nga ili idi Oktubre 4, 2010.

Nakasuan iti attempted murder iti provincial prosecutor’s office da Basilio Yadao, residente iti Barangay Teppeng, Sinait, Ilocos Sur; Bohot Sayo Baclig, residente iti Barangay Pug-os, Cabugao; Michael Yadao, residente iti Barangay Pug-os, Cabugao, maysa a Rolly ken dua pay a di nabigbig a kaduada gapu iti pananggandatda iti biag da Edgar Sinco y Sayo, 33, baro, residente iti Barangay Pug-os, Cabugao; Reymon Lorenzo y Blaza, 24, naasawaan, residente iti Barangay Daclapan, Cabugao, ken Regie Pagud y Gamuyod, 25, naasawaan, residente iti Barangay Pug-os, Cabugao idi agarup alas 9:20 ti bigat ti Oktubre 4, 2010.

Kinuna ni hepe ti polis ditoy Major William Nerona a sinaneb ti grupo dagiti suspek da Sinco ken kakaduana iti asideg iti Barangay Pug-os sada pinaltopaltogan dagitoy ngem awan ti napuntaanda.

Iti inisial nga inbestigasion ti polis, kagapgapu dagiti biktima iti municipal hall ditoy nga ili ket agdaldaliasatda a nakalugan iti motorsikloda iti national highway a sakup ti Barangay Pug-os, Cabugao idi pinaputokan ida dagiti suspek.

Nagkamang dagiti biktima iti uneg ti warehouse ti tabako idinto a naglibas dagiti suspek a nagpaamianan.

Nakarekobre dagiti nagresponde a polis iti 11 a kapsula a nagtaud iti cal. 45 ken maysa a kapsula ti cal super 38 iti nakapasamakan ti pammaltog.

Kinuna ni Nerona, posible nga adda lookout  dagiti suspek a nangitawag kadakuada nga addan da Sinco iti dalanda nga aggawid.

Innayon ti hepe a dati a susik ti kitkitaenda a nakagapu iti pannakagandat ti biag da Sinco. Nadakamatna pay nga adda kaso ti pammaltog a mapapati a nakainbolbaran ni Sinco iti napalabas.#

Comments are closed.