Footer

3,200 indigent a pamilia, immawat iti PhilHealth cards

VIGAN CITY – Agdagup iti 3,200 nga indigent a pamilia manipud nadumaduma nga ili ditoy probinsia ti nawarasan iti PhilHealth Insurance Card idi Oktubre sadiay Gabriela Silang General Hospital kas paset ti programa ti gobierno probinsial a pannakaipaay iti serbisio ti salun-at dagiti agindeg ditoy probinsia.

Kinuna ni Gov. Luis “Chavit” Singson a gagem ti gobierno probinsial a maikkan iti Philhealth cards amin a pamilia ngem saanda met a kabaelan a paggigiddanen isu a tunggal tawen a mangnaynayonda dagiti maikameng agingga iti maabotda ti gagemda.

“Agyamankami iti agtultuloy a pannakitinnulong dagiti doktortayo nupay agkurkurang a kanayon ti pondo,” kinuna ni Singson.

Sinaksian dagiti mangidaulo iti provincial health office, chief of hospitals dagiti walo a district hospitals ti probinsia, provincial social welfare and development office ken chief insurance officer Dr. Helen Tobias ti pannakaibunong dagiti PhilHealth cards.

Kinuna ni Tobias nga agtultuloy ti kampaniada a pannakaiwaras dagiti PhilHealth cards tapno ad-adu pay ti maikkan iti benepisio iti salun-at idinto nga inannugotna nga agingga iti agdama ket adu pay laeng ti saan a nakaenrol iti Philhealth.

Iti agdama, addan 53,301 a pamilia iti Ilocos Sur ti addaan iti PhilHealth cards wenno iti pakabuklan a 41.91%. Napaadda dagitoy babaen kadagiti LGUs; iti babaen ti tripartite agreement dagiti LGUs, provincial government ken congressional districts; solo a programa ti probinsia, ken manipud kadagiti private sponsors ken ti Department of Health.#

Comments are closed.