Footer

Miners’ Gang ti nangserrek Gemiline Pawnshop: polis-Candon

CANDON CITY – Dagiti kameng ti Miners Gang ti nangserrek ken nangkasakas iti linaon ti vault ti BHF Gemline Pawnshop, daytoy ti impalgak ti hepe ti kapolisan ditoy kalpasan a nakasuan dagiti suspek iti korte ditoy siudad.

Kinuna ni Police Supt. Marlo Castillo, hepe ti polis ditoy siudad a naipilan idi Septiembre 30 ti kaso a robbery maikontra kadagiti pito a kameng ti Miners’ Gang a pakairamanan da Julio Bedking, Noel Padilan, Nero Melecio, Elmer Padecao, Brando Kitongan, John Saleo-an, ken Jonathan Natiguing, agpapada nga awan permanente a residensiada iti Baguio City.

Mapattapatta a naisayangkat ti panagtakaw iti nasao a pawnshop idi rabii ti Septiembre 25 agingga iti parbangon ti Septiembre 27.

Iti panagimbestiga dagiti polis-Candon, simrek dagiti mannanakaw iti shop babaen ti panangkalida iti tunnel iti kanal ti sewerage a mapattapatta nga 6 a metro iti daya ti establisimiento ken panangaramidda iti abut a 40 pulgada ti diametrona iti pavement iti asideg ti safety vault ket idi nakastrekdan iti pawnshop, pinorsarda a linuktan ti safety vault sada kinurimes dagiti naggianna.

Agdagup iti P1 milion ti pateg dagiti nakasakas a nadumaduma nga alahas iti nasao a pawnshop.

Nakarekobre dagiti polis iti uneg ti pawnshop kadagiti rimienta nga inaramat dagiti mannanakaw a pakaibilangan ti crowbar, martilio, ken dadduma pay a digging tools.

Madama ti pannakaan-anup dagiti suspek, segun ti polis.#

Comments are closed.