Footer

Operation Pattog, panagdaldalus, epektibo a panglapped iti dengue: Bokal Singson

VIGAN CITY – Epektibo ti Operation Pattog ken panagdaldalus iti aglawlaw a pangkontra iti dengue, daytoy ti imbatad ni Bokal Jerry Singson bayat ti programana a Kakibin iti Balligi itay nabiit.

Kinuna ni Singson a nupay nagpangato ti bilang ti kaso a dengue iti probinsia idi bulan ti Agosto, nakontrol daytoy ket makitan ti epektona ti panangidariragna iti Operation Pattog ken panagdaldalus iti aglawlaw.

Kinuna ni Singson a kapaliiwanna nga iti umuna a sangapulo ket lima nga aldaw ti bulan ti Septiembre, 14 laengen ti bilang dagiti kaso ti dengue, adayo ti bimmabaanna no maikumpara iti nagsakit iti dengue idi Agosto.

Itudo ti bokal a ti idardariragna nga Operation Pattog ken panagdaldalus iti arubayan kadagiti kaprobinsiaanna ti makagapu ti panagpababa ti bilang dagiti kaso ti dengue iti probinsia idinto nga indagadagna ti pangitultuloy dagiti kaprobinsiaanna ti panagipattogda kadagiti amin a pakaurnongan ti danum a pagindegan ken pagitlogan dagiti lamok.

Maysa a kita ti lamok, ti aedes aegypti, ti agiwaras iti sakit a dengue babaen ti kagatda.

Iti report manipud iti provincial health team office, immabuten iti 700 a kaso ti dengue idinto a 13 ti natay manipud pay idi Enero agingga iti Septiembre 15 daytoy a tawen.

“Ngem ti napintas a damag, manipud iti Septiembre 1-15, 14 ti kaso ti dengue,” kinuna ni Singson sana indagadag ti panagtultuloy ti Operation Pattog ken panagdaldalus iti aglawlaw.

“Responsibilidadtayo amin a lumugar ti Operation Pattog ken kinadalus ta dayta ti makita a number one a panglapped iti panagraira ti dengue,” kinuna ni Singson.

Iti report manipud iti Department of Health, immaboten iti 62,503 dagiti kaso iti dengue ken nasurok metten a 465 dagiti natay manipud Enero 1 agingga idi Agosto 21, 2010, ad-adu ngem idi napalabas a tawen nga immabut laeng iti 33,102 ti kaso daytoy a sakit ket nakatayan ti 350 a tattao.#

Comments are closed.