Footer

BANNER NEWS: Kabalbalayan iti coastal barangays, dinuprak ti aluyo

VIGAN CITY – Imbes a pumanaw kalpasan ti panangsanotna iti Amianan a Luzon, nagintek ni Bagyo Juan iti South China sea idi Oktubre 19 ken 20 ket gapu ta napagtalinaedna ti pigsa ti angin iti sentrona, pinarnuayna dagiti dadakkel a dalluyon a nangduprak kadagiti kabalbalayan iti coastal barangays ditoy probinsia a nakaigapuan ti panagbakuit dagiti agindeg.

Inreport ni Genevieve Oriente, municipal social welfare and development officer, nga aganay 30 a kabalbalayan iti coastal barangays ti Santa ti dinadael ti aluyo (storm surge) idi Oktubre 20 maigapu iti saan a panagkir-in ni Bagyo Juan iti South China sea.

Pito a balbalay ti total a dinuprak ti aluyo idinto a 12 ti partially damaged iti Barangay Pasungol, 7 a balay ti totally destroyed iti Barangay Bucalag kasta met a  2 a balay iti Barangay Tabucolan.

Kinuna ti barangay captain ti Pasungol a nadadael metten ti barangay hall, ti akinlaud a paset ti pagbasketbolan ken ti community comfort room ken nadadael payen ti 30 metro a kabarbaro a seawall.

Kinuna ti nasao a barangay official a no agatab ken buyogan ti angin manipud iti abagatan, agdinakkel dagiti dalluyon ket daytoy ti sinipsiputanda.

Naammuan a 80 a pamilia manipud kadagiti tallo a barangay ti naibakuit, 14 a pamilia iti rural health unit idinto a nagpakni dagiti dadduma a bumarangay iti balay dagiti kakabagianda nga adda iti nataltalged a lugar.

Dua a balay ti naiyanud iti pasetna ti Sitio Curocodan iti Barangay Fuerte ti Caoayan iti karabian ti Oktubre 20 sa maysa pay iti pumarbangon ti Oktubre 21. Tallo pay a balay ti nagpeggad a maiyanud gapu iti panagdinakkel ti danum.

Segun iti maysa a barangay official, sinari dagiti dadakkel a dalluyon ti seawall ket naisualit dagiti sandbags a manglapped iti iseserrek ti danum iti kabalbalayan.

Dagus a nangipatulod ni Mayor Germie Goulart  kadagiti sako ket nagtitinnulongan dagiti bumarangay a pinunno iti darat sada insullat iti butaw ti seawall.

Nagpaarayat met dagiti agindeg iti Barangay Poro gapu ta agkurangen ti taraonda ngem saanda met a makapanaw iti lugarda gapu kadagiti dadakkel a dalluyon.

Iti met Vigan City, arig dilpatanen ti danum ti Playa de Oro iti Barangay Mindoro gapu iti panagdinakkel ti dalluyon.

Iti Sitio Mindanao iti Barangay Paratong, Sta. Catalina, sinari ti danum dagiti puttot ken dimmanon iti paraangan dagiti bumarangay gapuna a nagbakuit ti 29 a pamilia.#

Enhanced by Zemanta