Footer

ITI INDAYON NI LAGIP: Nakasalda nga ayat (Gibusna)

Napakidemak. Kayatko ti rumuk-at ngem awan ti gawayko. Nasarakak ketdi ti bagik nga umar-arakup kenkuana idinto nga umal-alimpatok ti imnas nga idi laeng a mariknak.  Iti dayta a darikmat, ammok, saannak nga agpangadua a mangipabus-oy iti bagik iti daytoy a lalaki a nagbalinen a dakkel a paset ti biagko.

Ad-adda nga immirut ti arakup ni Sir Marius idinto a nagdakiwas ti dakulapna iti barukongko. Napakidemak ket immirut met ti arakupko kenkuana. Kaarigko ti malmalmes, agtungtunglab iti naimnas a rikna nga umap-apon kaniak.

Ngem nagmulagatak idi pagammuan, limmukay ti arakup ni Sir Marius.

“Saan, dakkel a biddut daytoy!” nakunana.

Diak nakatimek. Umanges-angesak a nangipababa iti tisirtko. Agpayso ti kuna ni Sir Marius, dakkel a biddut la ketdi no itulokmi a mayagus ti riknami.

“Akuek, natinnag ti riknak kenka. Adda kenka dagiti saguday a diak nasarakan ken ni Lyka.  Ngem no adda mabukel a relasionta, saantan a mabalin a paglikudan ti suspetsa ni Lyka,” kinuna ni Sir Marius.

“No adda man napasamak kadata, boluntario nga intedko ken diakto pagbabawyan,” insungbatko.

“Saanko a maako a madadael ti masakbayam gapu kaniak.”

Timmakder ni Sir Marius. “Daytoyen ti maudi a yaayko ditoy. Amangan no iti sumaruno ket diak malapdan ti riknak.”

Namrayak laengen ti nagtung-ed idi agpakada.

Immalisak manen  iti kaserak. Diak kayat a maulit ti dandanimi pannakalipat ken ni  Sir Marius. Saanko a maipasigurado a mabaelak a subaen ti riknak kenkuana. Ngem adda dagiti rabii a dinak paturogen ti napasamak kadakami iti maysa a sardam. Kasla marikriknak pay la ti agekna, ti dakulapna a nagdakiwas iti barukongko. Kastoy gayam ti rikna ti agayat. Ngem ayat a masapul a laksidek agsipud ta adu a biag ti marakrak no itulokko lattan ti riknak nga agburayok a kas iti agus a mangbirok iti pagtarayanna.

Naruros dagiti pinanid ti panawen. Inggaedko ti nagadal. Pinagbalinko dagiti pasamak iti biagko a paratignay tapno agballigiak iti arapaapko a makaturpos iti panagadalko. Ni laengen Brenda ti pakadamdamagak iti mapaspasamak kada Sir Marius ken ni Ma’am Lyka.

Naammuak a natuloyen a narakrak ti pagtaenganda. Pinawaswas kano ni Ma’am Lyka ti kasarda ken ni Sir Marius. Madama ti pannakadengngeg iti kasoda. Ad-addan ti nariknak nga  asi ken ni Sir Marius. No mabalin laeng, tumayabak a mapan iti dennana tapno makitanak a makipagrikna kenkuana. Ngem pinengdak ti bagik. Ad-adda laeng a kumiro ti panagbiagda.

Sagpaminsan met nga agsabatkami ken ni Julius iti pagadalan. Ngem agpatingga lattan ti panagkinnablaawmi. Idi agangay, nakitak nga adda babai a kakinnibinna.

Nadanon ti panagturposko. Siak ngatan ti karagsakan a parsua idi graduationmi. Immay timmabuno ni Brenda.

Idi rummuarkamin iti pagadalan, diak ninamnama ti lalaki nga immasideg kaniak. Ni Sir Marius! Rimmapis.

“Congatulations!” inyisemna sanak linamano. Inyawatna kaniak ti regalona.

“Agyamanak, sir,” nakunak. “Kababain pay kenka ta awan ti pagblow-outko.”

Nagkatawa. “Saan a nasken dayta,” nakunana. “Ti importante, naragpatmon ti arapaapmo a makaturpos.”

“Dakkel nga utangko kenka, sir,”nakunak. “Diak ammo no kasano a makasubalitak kenka.”

Piniselna ketdi ti imak. “Ikarkararagko nga agballigika iti baro a direksion ti biagmo,” kinunana. Dayta laeng, nagpusipos ket nakilimogen kadagiti tattao a rumrummuaren iti pagadalan.

Insursurotko ti panagkitak iti likudanna, iti lalaki a nagbalin a dakkel a paset ti panagbiagko. Anian ta nagsarakkami iti saan a maikanatad a panawen ken gundaway!

“Ay, intan ket itay pay la a nakamagmaga ti karabukobko,” inkatawa ni Brenda ket ginuyodnakon. Immangesak iti nauneg ket simmurotakon kenkuana.#

Comments are closed.