Footer

KOMENTARIO: Proklamasion ti amnestia ni Pres. Aquino, rekonsiliasion kadagiti bumusbusor iti gobierno

Itay nabiit, pinirmaan ni Pres. Benigno Aquino III ti proklamasion a mangipaay iti amnestia kadagiti nasurok 300 nga opisial ti militar ken personnel a nainbolbar iti tallo a panagrebelde maikontra iti administrasion ni nag-Presidente Gloria Macapagal-Arroyo. Karaman dagiti ipaayan ti Proclamation No. 50 dagiti military officers ken personnel a nagisayangkat iti panagrebelde idi Hulio 27, 2003 wenno iti Oakwood Mutiny, ti panagrebelde dagiti Marines idi Pebrero 2006 ken ti panangukopar dagiti soldado ken military officials iti Manila Peninsula idi Nobiembre 29, 2007.

Karaman nga agsagrap iti amnestia da Senador Antonio Trillanes, Marine Captain Nicanor Faeldon, Marine Col. Ariel Querubin, ken Brig. Gen. Danilo Lim.

Segun iti Malakaniang, pinirmaan ni Aquino ti amnestia kas panangipamatmatna iti rekonsiliasion iti amin a bumusbusor iti gobierno aglalo ket madama ti panangiwayatna iti negosasion iti kappia iti Moro Islamic Liberation Front ken iti New People’s Army.

Iti met biang ni Chief Presidential Legal Counsel Eduardo de Mesa, saanen a kasapulan nga urayen pay dagiti soldado ti promulgasion dagiti kaso maikontra kadakuada sakbay a maikkanda iti amnestia. Iti nalawlawag a pannao, uray no maipromulgar a nagbasol dagiti akusado, ikkaten ti amnestia ti kriminal a liabilidadda ket maisubli kadagiti soldado ti sibil ken politikal a kalinteganda, pakairamanan ti kalinteganda nga agbutos, agpaidasig iti eleksion ken mabutosan. Malaksid dagita, maisubli pay ti kalintegan ti soldado nga agsagrap iti retirement ken separation benefits.

Iti panangpirma ni Presidente Aquino iti proklamasion ti amnestia dagiti nagrebelde a soldado, imbatad dagiti opisial ti Armed Forces of the Philippines ti panangrespetoda iti daytoy a desision ti Presidente.

“Iti AFP, ti presidente ti commander in chiefmi. Nangaramiden iti statement, instruksion ket dakami iti Armed Forces, madadaankami nga agtungpal,” imbatad ni Brig/Gen. Jose Mabanta, spokesman ti AFP.

Kinuna ni Mabanta a mangnamnama a pagkalmaen ti amnestia dagiti soldado nga adda ir-iruken ken pannakadismayada, aglalo ket inkari ti Presidente nga ikkanna iti prioridad dagiti problema ti military.

Kinuna ni Mabanta a manipud idi 1980s, adun dagiti panagbalbaliw a naiwayat iti organisasion, ket maysa laengen a napalabas ti adbenturismo ti military.

Inyunay-unay pay ti spokesman a nagbalinen a propesional ti Armed Forces.

Iti sabali a bangir, dinayaw dagiti senador ti pangngeddeng ni Pres. Aquino a maikkan iti amnestia dagiti soldado a nagrebelde.

Iti biang ni Sen. Gringo Honasan, nasayaat daytoy a pangrugian ti administrasion Arroyo tapno maikkan iti baro a paset ti biag dagiti nagrebelde a soldado ket impasingkedna iti panangsuportada iti daytoy iti Senado.

Ngem iti panangpirma ni Presidente Aquino iti proklamasion ti amnestia kadagiti nagrebelde a soldado, nabato met iti pammabalaw manipud iti dadduma a sektor, nangruna dagiti kameng ti oposision ken kaaliado ni dati a Presidente Arroyo.

Saan a mababalaw dagitoy agsipud ta dagiti military officers ken personnel a sumangsango iti kaso iti sanguanan ti military ken sibilian a korte ket nagrebeldeda maikontra iti administrasion ni dati a Presidente Gloria Arroyo.

(Adda tuloyna)

Comments are closed.